Rusia hap derën e Arktikut për Kinën – Kompanitë kineze ndërmarrin projekte të zhvillimit të porteve dhe minierave

Përmbysja e madhe në ekuilibrin e fuqisë midis vendeve konkurruese në Arktik është shkaktuar nga lufta e Rusisë në Ukrainë dhe izolimi i Moskës si pasojë e sanksioneve perëndimore. Ky izolim dhe braktisje nga ana e biznesit perëndimor jo vetëm që ka bërë që Rusia dhe ekonomia e saj të bëhen gjithnjë e më të varura nga Kina, por e kanë detyruar atë t’i hapë derën e Arktikut fqinjit të saj të fuqishëm, të pasur dhe të avancuar teknologjikisht, Kinës.

Rusia jo vetëm që po importon gjithnjë e më shumë produkte, njohuri dhe pajisje nga Kina, por po përdor ndihmën e saj për të çuar përpara projektet e infrastrukturës në pjesën ruse të Arktikut, si dhe për të transportuar naftën e saj nëpër korridoret e saj. Në këtë drejtim, është një kthesë e madhe në konkurrencën më të gjerë midis fuqive të mëdha për nëntokën e ngrirë të kontinentit dhe burimet natyrore.

Lufta në Ukrainë ka ndryshuar në mënyrë dramatike qëndrimin e Moskës, pasi sanksionet perëndimore e detyrojnë atë të mbështetet te Kina për të avancuar qëllimet e saj në Arktik. Ndryshimi u pa në mars kur presidenti kinez Xi Jinping vizitoi Moskën dhe homologu i tij rus Vladimir Putin foli për bashkëpunimin ‘shumë premtues’ të Rusisë me kompanitë kineze për të zhvilluar dhe shfrytëzuar Korridorin e Detit të Veriut.

Analistët shprehen se Rusia sigurisht që ka burimet njerëzore dhe njohuritë e nevojshme për rajonin, por nuk ka më as fondet e kërkuara dhe as teknologjinë. Dhe rezultati është “një avantazh për Kinën, e cila tani mund të ushtrojë ndikim dhe presion ekonomik mbi Rusinë dhe ta zhvillojë këtë korridor sipas nevojave të veta”.

Ndërsa, bizneset perëndimore filluan të largoheshin nga Rusia, Moska iu drejtua kinezëve për ndihmë në zhvillimin e porteve, minierave dhe infrastrukturës në pjesën ruse të Arktikut. Kjo është arsyeja pse që nga shkurti ka modifikuar një dokument zyrtar në lidhje me politikën e saj në Arktik dhe ka zëvendësuar ‘forcimin e marrëdhënieve të fqinjësisë së mirë me të gjitha vendet e Arktikut’ me theksin ‘në aksesin e të gjitha vendeve të huaja’, formulim që hap më tej rrugën për në Kinë.

Disa projekte kineze në Arktik janë ende në nivel teorik, megjithatë, ka një fushë ku aktiviteti është intensiv dhe ka të bëjë me eksportet e energjisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.