Normat e larta “zbehin” mikrofinancën në Kosovë – Interesi i kredive, mesatarisht në 19%. Tre herë më shumë krahasuar me bankat
Norma mesatare e interesit në kreditë e dhëna nga sektori i mikrofinancës në Kosovë në qershor 2023 ishte 19.0%, që krahasuar me sektorin bankar është thuajse trefish më e lartë për shkak të kostos së ulët të financimit të aktiviteteve.
Sipas Bankës Qendrore të Kosovës, sektori i mikrofinancës kryesisht financohet nga kreditë e marra nga sektori i jashtëm, që ka norma më të larta të interesit. Zhvillimet e fundit në sektorin financiar, përkatësisht rritja e normave bazë të interesit nga bankat qendrore, pritet të reflektohet në koston e financimit të sektorit dhe potencialisht, të përkthehet në rritje të mëtejshme të normës së interesit në kredi të ofruar nga ky sektor.
Norma e interesit për kreditë e ekonomive familjare shënoi rënie për 0.4 pikë përqindje, në 21.1%. Sipas llojit të kredive, norma mesatare e interesit në kreditë konsumatore u rrit me 1.3 pikë përqindje në 22.9%. Kurse, kreditë hipotekare vazhdojnë të kenë normat më të ulëta të interesit, në një mesatare prej 17% në qershor 2023 dhe krahasuar me vitin e kaluar shënuan rënie për 1.1 pikë përqindje.
Për korporatat jofinanciare, normat mesatare të interesit, u rrit për 0.9 pikë përqindje, në 15.9% në qershor 2023. Normat e interesit për kreditë në sektorin e bujqësisë dhe atë të industrisë përkatësisht ishin 17.8% dhe 17.3%. Ndërsa, kreditë ndaj sektorit të shërbimeve, që kanë kushtet më të favorshme të interesit, në fund të qershorit 2023 kishin normë të interesit prej 14.8%.
Por, pavarësisht normave të larta të interest, niveli i kredive me probleme në sektorin e mikrofinancës mbetet i ulët dhe në fund të qershorit u regjistrua në 1.8%. Nga ana tjetër ky sektor shënoi fitim neto në vlerë prej 8.2 milionë euro gjatë gjysmës së parë të vitit.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.