Sa do të paguajnë institucionet për tenderët? – Vendosen tarifat e “Operatorit të Blerjeve të Përqendruara”sh.a.
Kryeministria, ministritë e linjës dhe institucionet e varësisë tani e tutje duhet të paguajnë një tarifë fikse për shërbimet e prokurimeve. Gjithçka përcaktohet në vendimin e fundit të Këshillit të Ministrave të publikuar në Fletoren Zyrtare. Por, cilit organi duhet t’i paguhet tarifa? Në fund të vitit të kaluar Agjencia Shtetërore e Prokurimeve të Përqendruara u shndërrua në shoqëri aksionare shtetërore të emërtuar “Operatori i Blerjeve të Përqendruara” sh.a.
Sipas vendimit, kjo shoqëri ka përgjegjësi të organizojë punën për kryerjen e procedurave të prokurimit, për të nënshkruar marrëveshjen kuadër deri në lidhjen e kontratës. “Operatori i Blerjeve të Përqendruara”, si organ qendror blerës, do të zhvillojë procedurat në fushën e prokurimit të mallrave, shërbimeve dhe punëve, që nga nga blerjet e automjeteve, karburantit, shërbimit të lavanderisë, sigurimi i jetës, shëndetit e deri te rikonstruksioni i objekteve.
Shoqëria aksionare financohet nga të ardhurat e veta, të ardhura nga shërbimet ndaj të tretëve, të konsulencёs, nga ofrimi i shërbimeve dhe burime të tjera të ligjshme. Pikërisht, për të siguruar këto të ardhura në vendimin e fundit përcaktohet se çdo institucion që kërkon të përgatisë dhe zhvillojë procedurat e prokurimit deri në 200 milionë lekë pa TVSH, duhet t’i paguajë shoqërisë aksionare 2,5% të vlerës së fondit të kërkuar për t’u prokuruar.
Për çdo procedurë me vlerë mbi 200 milionë lekë, tarifa do të jetë 5 milionë lekë. Por, “Operatori i Blerjeve të Përqendruara” sh.a.. mund të ofrojë edhe konsulencë për përgatitjen e procedurave të prokurimit publik, për të cilën ka vendosur një tarifë prej 7 mijë lekë ora.
Për kryerjen e çdo shërbimi në kuadër të veprimtarive ndihmëse, autoriteti/enti kontraktor/subjektet e tjera publike duhet të kryejnë pagesën e tarifës së kryerjes së shërbimit pranë “Operatori i Blerjeve të Përqendruara” sh.a. jo më vonë se 10 ditë kalendarike nga lëshimi i faturës. Ndërkohë, fillimi i çdo shërbimi kushtëzohet nga pagimi i tarifës nga ana e autoritetit/entit kontraktor/subjektit tjetër publik.
Nëse “Operatori i Blerjeve të Përqendruara” sh.a., gjatë trajtimit të kërkesës, konstaton se nuk është realizuar pagesa e shërbimit, nuk vijon me kryerjen e shërbimit, publikimit, zhvillimit të procedurës së prokurimit, nëse është rasti. Shërbimet realizohen vetëm pasi kërkuesi të ketë shlyer tërësisht vlerën e tarifës së shërbimit të kërkuar.
Dhjetorin e vitit të kaluar qeveria miratoi një projektligj që do të bëjë të mundur digjitalizimin e plotë të procesit të prokurimeve publike, duke nisur me kryerjen e vlerësimit automatik të plotësimit të kritereve për kualifikimin e ofertuesve në fazën e parë të parakualifikimit. Me këtë model synohet që i gjithë procesi të jetë transparent dhe i lexueshëm.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.