“Vëmendje te rritja e pagave dhe reforma e pensioneve” – Ministri Gonxhja, në panairin e punës: Bashkëpunim për të kapërcyer sfidat
Për disa vite me radhë, edhe këtë vit është zhvilluar panairi i punës dhe karrierës në Fakultetin e Ekonomisë, në Universitetin e Tiranës. Një tryezë e përbashkët bëri bashkë aktorë të biznesit, dekanin e fakultetit si dhe Ministrin e Ekonomisë, Kulturës dhe Inovacionit, Blendi Gonxhja.
Gjatë fjalës së tij, ministri Gonxhja theksoi se këtë vit do të kenë vëmendje rritja e pagave, si dhe një reformë pensionesh.
Blendi Gonxhja u shpreh: “Ne do bëjmë të pamundurën të rrisim pagat, është histori fitore. Sjellin një rritje të menjëhershme të konsumit. Ne do bëjmë ç’është e mundur sivjet të hapim sytë dhe mendjen për një reformë të plotë për pensionet. Nuk mund të jenë në këtë gjendje që ne I kemi trashëguar. Pensionet janë një motivator i plotë.”
Sipas tij duhet një bashkëpunim me disa aktorë bashkë për të kapërcyer sfidat ekonomike.
“Nëse do të kemi një rezultat sa më të mirë, në zhvillimin e vendit tonë, pa biznesin, pa universitetin, pa bashkitë, sfida nuk mund të konceptohet të ndërmerret”, tha ai.
Ndërkohë në panairin e zhvilluar në Fakultetin e Ekonomisë morën pjesë mbi 60 kompani pjesëmarrëse të sektorit bankar, konsulencës, telekomunikacionit, inovacionit, turizmit, start up-e, shoqatat e biznesit etj.
Diamila Leka/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.