Sa do t’i kushtonte Shqipërisë një sistem i ri për tenderët? – Skenaret variojnë nga 35-59 milionë euro

Sistemi i ri elektronik i prokurimit publik pritet t’i kushtojë buxhetit të shtetit nga 35 mln euro, deri në 59 mln euro. Ligji që parashikon ringritjen e sistemit, si dhe sjell një sërë ndryshimesh në procedurat tenderuese është publikuar në Fletoren Zyrtare, duke hyrë në fuqi.

Ndërkohë që, diferenca e madhe në kosto lidhet me 2 skenarë që mund të aplikohen për një sistem të ri. Në skenarin bazë kosto shkon në rreth 35 mln euro dhe së bashku me një vlerë prej 20% për shërbime të paparashikuara, ky skenar shkon në rreth 42 mln euro.

Ndërkohë që, skenari maksimal, që parashikon implementimin e modelit më të shtrenjtë që është ai Korean, kjo vlerë parashikohet në rreth 49 mln euro dhe së bashku me 20% për shërbime të paparashikuara, vlera arrin në rreth 59 mln euro.

Ngritja e një sistemi të ri elektronik është argumentuar me nevojën për rritje të transparencës, lehtësimit të procedurave, shmangies së konfliktit të interest dhe rritjes së eficiencës në procedurat e prokurimit.

Në relacionin që shoqëronte ligjin në Kuvend, thuhej se në këtë kuadër, disa procese të prokurimit publik, sikurse janë: përllogaritja e vlerës limit të kontratës, studimi i tregut, hartimi i specifikimeve teknike duhet të kryhen në sisteme elektronike të certifikuara, mbështetur në ndërveprim me sisteme të tjera të Platformës Qeveritare të Ndërveprimit.

Për këtë qëllim, është propozuar që Sistemi i Prokurimeve Elektronika të zhvillohet duke përdorur teknologji të avancuar të inteligjencës artificiale dhe procese të robotizuara në përputhje me parashikimet evropiane.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.