Sa para’ derdhën lojërat e fatit në buxhet? – Të dhënat zyrtare/ Rritet aktiviteti në kazino në 2023-shin

Të ardhurat nga veprimtaritë e lojërave të fatit të derdhura në buxhetin  shtetit në vitin 2023 regjistrohen në afro 2.2 miliardë lekë apo 21 milionë euro,  dhe në rritje me rreth 10.3 % krahasuar më një vit më parë.

Të dhënat zyrtare nga Drejtoria e Përgjithshme e Tatimeve, tregojnë se në raport me planifikimin vjetor, të ardhurat janë rritur me 8.4 për qind.

Arkëtimet janë bërë nga tatimi i aktivitetit në kazino, lojërat elektronike, makinat slot me fitim në çast, Lotari Kombëtare, Bingo televizive, pasi bastet sportive zyrtarisht kanë qenë të ndaluara dhe si rrjedhim nuk ka gjeneruar të ardhura në buxhetin e shtetit për shkak se ka qenë informal.  Me formalizmin e këtij aktiviteti nga muaji prill 2024 dhe në vijim, të ardhurat pritet të rriten.

Me ligjin e ri për lojërat e fatit,  do të rritet edhe detyrimi tatimor për tatimpaguesit që ushtrojnë veprimtari në fushën e organizimit të lojërave të fatit në “Kazino”, “Kazino në hotele me 5 yje” dhe “Resort kazino”,  për disa kategori lojërash nga 12 % që ka qenë deri më tani,  në 25 %.

Konkretisht   për tryezat me më shumë se një pozicion (ruletë) paguhet një taksë mujore në masën 25 për qind të të ardhurave bruto nga loja, por jo më pak se 300 mijë lekë në muaj për çdo pozicion; për çdo tryezë të lojërave (me letra dhe/ose me zara), paguhet një taksë mujore në masën 25 për qind të të ardhurave bruto nga loja, por jo më pak se 1.5 milionë lekë,  ndërsa  për lojërat elektronike dhe për video-lotarinë, të vendosura në mjediset e kazinosë si dhe makinat slot me fitim në çast, taksa mujore nuk ndryshon dhe do të jetë në masën 25 për qind nga të ardhurat bruto nga lojërat e fatit.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.