Sekuestrohen orë, diamantë e flori kontrabandë – Shiteshin online dhe në 2 dyqane në kryeqytet. Dy në prangat e policisë

Ora të markave të shtrenjta, aksesorë diamanti dhe floriri, por edhe sasi e konsiderueshme valute. Ky ka qenë bilanci I një aksioni të Policisë së Shtetit dhe Drejtorisë Vendore të Tatimeve në kryeqytet.

Si rezultat i monitorimit intensiv paralel, të bizneseve që e ushtrojnë aktivitetin e tyre në njësi fizike dhe/ose online, u organizua dhe finalizua operacioni policor i koduar “Sahati”.

Në kuadër të këtij operacioni janë gjurmuar dy dyqane që shisnin ora dhe aksesorë të tjerë, online dhe në njësi fizike në kryeqytet. Gjatë kontrolleve në njërin dyqan (të paregjistruar në organet tatimore), me administrator shtetasit D. S. 52 vjeç, u sekuestruan me cilësinë e provës materiale, 195 ora të markave të shtrenjta dhe 19 palë syze, ndërsa në dyqanin tjetër, me administrator shtetasin K. Z. 44 vjeç, u sekuestruan me cilësinë e provës materiale, 33 ora të markave të shtrenjta, aksesorë diamanti dhe floriri, si dhe 5100 euro, 2000 dollarë dhe 121 400 lekë të dyshuar të përfituar nga kjo veprimtari kriminale.

Në vijim të veprimeve procedurale për këto raste, u kapën dhe u vunë në pranga administratorët e dy dyqaneve, të dy banues në Tiranë. Gjithashtu, u referuan materialet në Prokurori, për moskryerje të detyrës, për punonjësit e Drejtorisë Vendore të Tatimeve Tiranë, që mbulojnë zonat ku janë dy dyqanet.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.