SHBA kufizon tregtinë me 42 subjekte kineze – Shkak, mbështetja për ushtrinë ruse!

Departamenti Amerikan i Tregtisë shtoi të premten 42 kompani kineze në listën e kontrollit të eksporteve të qeverisë për mbështetjen e tyre për bazën industriale ushtarake dhe të mbrojtjes të Moskës – mbështetje që përfshin furnizimin e qarqeve të integruara me origjinë nga SHBA.

Shtatë subjekte të tjera nga Finlanda, Gjermania, India, Turqia, Emiratet e Bashkuara Arabe dhe Mbretëria e Bashkuar u shtuan gjithashtu në listën e kontrollit të eksporteve tregtare.

Qarqet përfshijnë mikroelektronikë që Rusia përdor për sistemet e drejtimit preciz në raketat dhe dronët e lëshuar kundër objektivave civilë në Ukrainë, tha Departamenti i Tregtisë në një deklaratë.

“Shtesat e sotme në listën e entiteteve ofrojnë një mesazh të qartë: nëse furnizoni sektorin rus të mbrojtjes me teknologji me origjinë nga SHBA, ne do ta zbulojmë dhe do të ndërmarrim veprime,” tha në deklaratë Ndihmës Sekretari për Zbatimin e Eksportit, Matthew Axelrod.

Kina e quajti veprimin e SHBA-së “shtrëngim ekonomik dhe bullizëm të njëanshëm”.

“Shtetet e Bashkuara duhet të korrigjojnë menjëherë praktikat e tyre të gabuara dhe të ndalojnë shtypjen e paarsyeshme të kompanive kineze,” tha Ministria e Tregtisë e Kinës në një deklaratë.

Kanë kaluar 20 muaj që kur rusët pushtuan Ukrainën. Një sulm me raketa ruse në një fshat në Ukrainën verilindore të enjten vrau të paktën 52 persona në një nga sulmet më vdekjeprurëse deri më tani.

Kompanitë shtohen në listën e entiteteve të SHBA-së kur Uashingtoni i konsideron ato si një kërcënim për sigurinë kombëtare ose politikën e jashtme të SHBA-së. Më pas, furnitorëve duhet t’u jepen licenca përgjithësisht të vështira për t’u marrë përpara se të dërgojnë mallra te subjektet në listë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.