Shpërblim në natyrë të shpronësuarve për interes publik – Aplikohet kur kompensimi është shumë i lartë, ose kur i shpronësuari s’ka banesë tjetër

Qeveria i ka hapur rrugë shpërblimit në natyrë të të prekurve nga shpronësimet për interes publik. Vendimi, i zbardhur nga Televizioni Scan, përcakton se këta të fundit mund të kompensohen me prona shtetërore në rastet kur është i vështirë apo i pamundur dëmshpërblimi financiar. Më specifikisht, kjo formë dëmshpërblimi, do të aplikohet në rastet kur vlera e shpronësimit është shumë e lartë në raport me vlerën e fondit buxhetor të shpronësimeve; si dhe në rastet kur prona që shpronësohet është njësi banimi, dhe pronarët nuk kanë njësi banimi tjetër në pronësi, kanë nevojë strehimi dhe atyre mund t’u sigurohet banesë nga banesat në pronësi të shtetit.

Më tej, vendimi përcakton se subjektet që shpronësohen për interes publik, shpërblehen në natyrë, së pari nëpërmjet shkëmbimit të pasurisë që u shpronësohet me një pasuri tjetër të paluajtshme, në pronësi të shtetit me të njëjtën vlerë me pasurinë që shpronësohet; dhe së dyti nëpërmjet kombinimit të formës së shpërblimit në vlerë financiare me shkëmbimin në natyrë të pasurisë.

Kërkesa për shpronësim me shpërblimin në natyrë paraqitet nga institucioni publik në favor të të cilit bëhet shpronësimi, dhe merret në shqyrtim nga Agjencia Shtetërore për Shpronësimet. Por shpërblimi në natyrë mund të kërkohet edhe nga vetë subjekti që preket nga shpronësimi për ineters publik, i cili i drejtohet me kërkes po ashtu Agjencisë Shtetërore për Shpronësim.

Subjekti kërkues mund të propozojë kompensimin nëpërmjet shpërblimit në natyrë për të gjithë ose për një pjesë të pronarëve, që preken nga projekti për të cilin po kryhet shpronësimi për interes publik.

Në çdo rast, pasuria e paluajtshme në pronësi të shtetit, që mund të përdoret si shpërblim në natyrë, duhet të jetë e lirë nga çdo lloj barre, konflikti gjyqësor apo pengesë tjetër ligjore. Po ashtu, vendimi përcakton se shpërblimi në natyrë realizohet vetëm pasi merret pëlqimi i subjektit që shpronësohet. Pëlqimi i subjektit që shpronësohet për të marrë shpërblimin në natyrë duhet të jetë unanim i të gjithë bashkëpronarëve, e konfirmuar nëpërmjet një akti noterial të nënshkruar nga të gjithë bashkëpronarët ose përfaqësuesit e tyre me prokurë, në të cilin përshkruhet në mënyrë të qartë e të saktë pasuria e paluajtshme në pronësi të shtetit, që do të përdoret si shpërblim në natyrë dhe pranimi i shpërblimit për shpronësimin për interes publik nëpërmjet shpërblimit në natyrë.

Gjithsesi, qeveria është kujdesur që të përjashtojë nga ky proces pronat shtetërore me vlera të larta. Nuk do përdoren përë këtë qëllim pasuritë e paluajtshme në pronësi të shtetit, që ndodhen në zonat bregdetare, zonat për zhvillimin e turizmit dhe pasuritë e tjera që ndalohen për t’u tjetërsuar, sipas legjislacionit në fuqi.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.