Shqetësime rreth nivelit të kërkesës – Bie çmimi i naftës në bursa. Optimizëm për rimëkëmbjen e Kinës

Çmimet e naftës ranë me rreth 1% të hënën, pas rritjes në seancën e mëparshme, pasi investitorët u përqendruan në shqetësimet për kërkesën afatshkurtër që rrjedhin nga të dhënat e ardhshme të rëndësishme të inflacionit të SHBA-së dhe mirëmbajtja e rafinerisë në Azi dhe Shtetet e Bashkuara të Amerikës.

Kontratat e së ardhmes së naftës Brent ranë 86 cent, ose 1%, në 85.53 dollarë për fuçi. Nafta e papërpunuar amerikane West Texas Intermediate ishte në 78.83 dollarë për fuçi, 89 cent ose 1.1%, pas rritjes me 2.1% në seancën e mëparshme.

Sipas analistëve vendas çmimet e naftës së papërpunuar po zbuten pasi tregtarët e energjisë parashikojnë një perspektivë potencialisht dobësuese të kërkesës pasi një raport kryesor i inflacionit mund ta detyrojë FED-in të shtrëngojë politikat në mënyrë shumë më agresive

Rezerva Federale e SHBA ka rritur normat e interesit për të frenuar inflacionin, duke shkaktuar shqetësime se masa do të ngadalësojë aktivitetin ekonomik dhe kërkesën për naftë. Për më tepër, rifillimi i eksporteve të naftës nga Azerbajxhani të dielën në terminalin Ceyhan të Turqisë, lehtësoi gjithashtu shqetësimet e furnizimit.

Terminali ishte dëmtuar nga tërmetet shkatërruese që goditën Turqinë dhe Sirinë javën e kaluar. Këtu ndodhet dhe pika e magazinimit dhe ngarkimit për tubacionet që transportojnë naftë nga Azerbajxhani dhe Iraku.

Çmimet e naftës u rritën të premten pasi Rusia, prodhuesi i tretë më i madh në botë i naftës, tha se do të ulë prodhimin e naftës së papërpunuar në mars me 500 mijë fuçi në ditë, ose rreth 5% të prodhimit, në shenjë hakmarrjeje ndaj kufizimeve perëndimore në eksportet e saj për shkak të luftës në Ukrainë.

Në baza javore, të dyja kontratat Brent dhe WTI u rritën me më shumë se 8% javën e kaluar, të nxitura nga optimizmi për rimëkëmbjen e kërkesës në Kinë, importuesi më i madh në botë i naftës së papërpunuar dhe konsumatori numër 2 i naftës. Rimëkëmbja e kërkesës për naftë të Kinës po frenon eksportet e saj të benzinës në shkurt, megjithëse rafineritëë e saj po mbajnë dërgesat me naftë në mbi 2 milionë tonë.

Çmimet e naftës mund të rifillojnë rritjen e tyre në 100 dollarë për fuçi më vonë këtë vit për shkak të rimëkëmbjes së kërkesës së Kinës dhe rritjes së kufizuar të ofertës si pasojë e mungesës së investimeve, thanë zyrtarët e OPEC.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.