Shqipëria, më e lira për kafe në Europë! “Indeksi espresso” i “Travelbook”/ Në Tiranë vetëm 0,70 euro, në Kopenhagen 4 euro

Një indeks i revistës gjermane “Travelbook” të specializuar për turizëm, arrin në përfundimin se Tirana ofron çmimin më të lirë të një kafe ekspres për vetëm 0,70 euro, krahasuar me të gjitha kryeqytetet europiane. Ndërsa, kryeqyteti I Danimarkës, Kopenhagen rezulton me çmimin më të shtrenjtë prej 4 euro. Sipas “Indeksit Espresso”, në 14 kryeqytetet më të shtrenjta në Europë, një filxhan kafeje varion nga 2,49 euro në Bruksel, deri në 4 euro në Kopenhagen. Në listën e më të shtrenjtave përfshihen kryeqytete si Amsterdami, Oslo, Athina, Luksemburgu, Londra, Parisi, Helsinki, etj.

Pothuajse në të gjitha këto qytete, kosto e jetesës është mjaft e lartë. Sipas një studimi, njerëzit në Zvicër, Luksemburg, Islandë dhe Norvegji kanë fuqinë blerëse më të lartë për banor në Europë. Pra, nuk është çudi që ekspresi është një nga më të shtrenjtët atje. Nga ana tjetër, është befasuese vendosja e Athinës në Top Listën e “Espresso Index”. Megjithatë, kryeqyteti i Greqisë konsiderohet një magnet turistik, kështu që çmimi ndoshta bazohet kryesisht në këtë fakt dhe më pak në fuqinë blerëse të banorëve të saj.

Në Europën Jugore dhe Lindore ekspresi aktualisht është më i liri. Sa më larg në jug dhe në lindje të udhëtohet, aq më i lirë bëhet ekspresi. Është sidomos i lirë në pothuajse të gjitha vendet e Ballkanit dhe në Gadishullin Iberik. Edhe në atdheun e ekspresit, Itali, duhet të paguash vetëm pak më shumë se një euro, përkatësisht 1,12 euro.

Në katër vende europiane, çmimi mesatar i një ekspresi është edhe më pak se një euro: San Marino, Kosovë, Shqipëri dhe Maqedoni e Veriut. Sipas të dhënave, rezulton se Shqipëria dhe Maqedonia e Veriut zënë dy vendet e fundit si në Indeksin e Espressos ashtu edhe në Prodhimin e Brendshëm Bruto. Në Shkup dhe Tiranë, një filxhan kafeje kushton përkatësisht 0,89 dhe 0,70 euro.

Por, si u hartua ky indeks. Për çmimet mesatare të ekspresit, TRAVELBOOK shikoi më shumë se 400 menu nga kafenetë, restorantet dhe baret. Çmimi mesatar u përcaktua nga të paktën gjashtë karta menuje në internet. Vendndodhja ishte gjithashtu një kriter: Të gjitha çmimet vijnë nga restorantet që ndodhen në qendër të një kryeqyteti, ose në zona të gjalla dhe të njohura. Përzgjedhja e vendndodhjeve ishte subjektive. U shtuan çmimet për vendet që nuk përdorin euron, u llogarit mesatarja dhe më pas u konvertua në monedhën e përbashkët duke përdorur kursin e këmbimit të datës 16 qershor 2022.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.