Shqipërisë i shtohen hyrjet edhe nga Afrika e Azia – Turistët, jo vetëm nga Europa. Rritje e fortë edhe SHBA

Në këto 5 muaj të vitit, janar-maj, numri i shtetasve të huaj që kanë hyrë në territorin shqiptar është 2 milionë e 389 mijë e 899 persona. Shifra është publikuar nga Instat, sipas të cilit, ky numër është rritur me 42,5 %, krahasuar me të njëjtën periudhë të vitit 2022. Shifra konfirmon se Shqipëria është kthyer në një destinacion të rritjes së fortë të turizmit. SCAN ka analizuar në mënyrë të detajuar se nga po i vijnë turistët apo vizitorët Shqipërisë.

Referuar të dhënave që Instat ka përpunuar nga informacioni i siguruar nga Policia e Shtetit, pjesa dërrmuese e hyrjeve është nga Europa e më konkretisht nga pjesa jugore e saj. Megjithatë, ajo që konstatohet është se ka një tendencë të fortë rritëse të turistëve nga kontinentet e tjera.

Rritje të fortë kanë pësuar hyrjet nga Afrika. Në periudhën janar-maj 2023, rezulton se janë më shumë se 4200 hyrje nga afrika, në një kohë që në të njëjtën periudhë të një viti më parë, numri ishte vetëm 940. Pra, këtë vit ka një rritje me 3200 hyrje më shumë.

Po ashtu, hyrjet nga Shtetet e Bashkuara të Amerikës kanë rritje të ndjeshme. Nga 39 mijë që ishte vitin e kaluar, këtë 5-mujor shifra është rritur në 55 mijë. Nga rajoni i Azisë Lindore dhe Paqësori rritja është gjithashtu e fortë pasi nga rreth 6 mijë hyrje, numri është rritur në 15 mijë. Lindja e Mesme ka gjithashtu rritje, por jo në intensitetin e rajoneve të tjera të botës, me vetëm 500 hyrjë me shumë në 6 muaj. Ndërkohë, hyrjet nga Azia e Jugut janë rritur nga 2 mijë e 500 në 4 mijë e 400. E ndërsa në Shqipëri rritet numri i hyrjeve të shtetasve të huaj, nuk mungon as rritja e numrit të daljeve të shtetasve shqiptarë, ku rritja e këtij 5-mujori, është me rreth 1 milionë dalje më shumë se 5-mujorin e vitit të kaluar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.