Shqiptarët kursejnë me celularët, pakësojnë telefonatat – Totali i thirrjeve dalëse këte verë 1.3 miliardë minuta, me rënie prej 8.1%

Duket se vështirësitë ekonomike janë reflektuar edhe te përdorimi i telefonëve celularë, i cili shënoi rritje të fortë veccanërisht gjatë kohës së pandemisë. AKEP raporton se në verën e këtij viti, megjithëse janë shtuar kartat telefonike në qarkullim, volumi i përgjithshëm i thirrjeve përmes rrjeteve celulare ka rënë ndjeshëm.

Sipas treguesve zyrtarë të sapopublikuar, totali thirrjeve dalëse të gjeneruara nga pajtimtarët celularë në Shqipëri në T2 2022 ishte rreth 1.3 miliardë minuta, me rënie prej 8.1% me T2 2021.

Tkurrja është edhe më e dukshme po ti referohemi thirrjeve drejt rrjeteve të tjera, të cilat janë më të kushtueshme se thirrjet brenda një operatori. Sasia e thirrjeve drejt rrjeteve të tjera celulare kombëtare (off-net) pësoi rritje me 2.7% në krahasim me T1 2022 dhe rënie me 14.4% në krahasim me një vit më parë në T2 2021, raporton AKEP.

Ndërkaq, sasia e thirrjeve on-net pësoi rritje me 4.6% në krahasim me T1 2022 dhe pësoi një rënie me 2.9% në krahasim me T2 2021. Ndërkaq, Proporcioni i thirrjeve on-net/off-net në T2 2022 ishte 57%/42%, kundrejt 54%/45% në T2 2021, një tjetër tregues që flet për tendencë të tkurrjes së shpenzimeve.

Numri i pajtimtarëve të shërbimeve celulare sipas kartave SIM në fund të T2 2022 ishte rreth 3,440,948 që përbën një rritje me 0.7% në krahasim me tremujorin e mëparshëm, dhe një rritje me 7.8% në krahasim me T2 2021.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.