Shtohen detyrimet e prapambetura në buxhet – Në tre muaj akumulohen 5.1 miliardë lekë borxhe të reja

Qeveria qendrore dhe ajo vendore kanë rritur ndjeshëm vlerën e detyrimeve të prapambetura ndaj bizneseve dhe qytetarëve, përkundrejt synimit të uljes së tyre. Sipas të dhënave zyrtare të Ministrisë së Financave, vetëm në 3 muaj, që i takon periudhës Prill-Qershor, stoku i detyrimeve është rritur me afro 5.1 miliardë lekë. E thënë ndryshe, nga 12.76 miliardë që ishin në fund të Marsit, në fund të qershorit ky stok regjistrohet në afro 17.9 miliardë lekë.

Peshën e rritjes së borxhit e mban qeveria qendrore, e cila gjatë tre muajve, ka akumuluar 4.5 miliardë lekë, ndërsa vendorët kanë kapërcyer me vetëm 0.6 miliard lekë.  Kategoria e investimeve, pra punëve publike të hapura por të pa likujduara në kohë, ka ndikimin kryesor në këtë aspekt.

Konkretisht nga detyrimi total, 10 miliardë lekë e përbën kategoria investime, e ndjekur nga vendimet gjyqësore për largime të padrejta nga puna apo ankimime të bizneseve, të cilat llogariten në afro 3.6 miliardë lekë. 2.6 miliardë lekë i zë kategoria të tjera dhe 208 milionë janë sigurime shoqërore të punonjësve, të cilat nuk janë paguar në kohë.

Duket se kjo ecuri lidhet ngushtë me zgjedhjet vendore të 14 majit, ku është koha që zakonisht investimet rriten ndjeshëm për shkak  të fushatës, dhe në këtë rast ato nuk kanë bërë përjashtim, edhe pse nuk kanë qenë fondet e nevojshme në dispozicion.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.