Sistem i ri për detektimin e zjarrit në pyje – Bashkia e Shkodrës hap tenderin me vlerë 13,613 milionë lekë

Fenomeni i zjarreve kryesisht në pyje gjatë stinës së thatë është i pranishëm në vendet e Mesdheut përfshirë Shqipërinë. Kostot e shuarjes janë tepër të larta, por edhe më të larta janë për rehabilitimin e pyjeve. Së fundmi, Bashkia e Shkodrës ka hapur një tender me objekt “Furnizim vendosje i sistemit të detektimit të zjarrit në pyje”.

Fondi prej rreth 13,613 milionë lekë financohet në kuadër të Programit të bashkëpunimit ndërkufitar Mali i Zi–Shqipëri 2014-2020 nën Instrumentin e Asistencës së Para-Aderimit (IPA II). Marrëveshja e grantit është e lidhur ndërmjet Ministrisë së Financave të Malit të Zi dhe partnerit lider Fondacioni për Autonomi dhe Qeverisje Lokale, si dhe Bashkisë Shkodër.

Kohëzgjatja e kontratës/marrëveshjes kuadër, ose afati për zbatimin e saj është tre muaj, ndërsa afati i fundit për paraqitjen dhe hapjen e ofertave do të jetë data 15/04/2024, ora 10:00.

Stacioni i Monitorimit propozohet të vendoset në kodrën e fshatit Bardhaj, njësia administrative Rrethina, Bashkia Shkodër. Aktualisht, një antenë e telefonit celular është e vendosur në këtë pozicion dhe në këtë mënyrë, ofrohet lidhje me energji elektrike dhe internet. Për shkak të pozicionit të favorshëm të Stacionit të Monitorimit, shihet edhe zona e Taraboshit, ku distanca në vijë ajrore është rreth 8 km.

Në dokumentet specifike të tenderit përcaktohet se me kamerat duhet të zbulojnë shenjat e zjarrit në kohë reale bazuar në analizën automatike të imazhit. Duhet të zbulojnë automatikisht zjarrin 10 km larg, ndërsa në modalitet manual deri në 20km. Gjithashtu, duhet të dallojnë zjarrin gjatë ditës dhe natës, si dhe të ruajnë të gjitha imazhet që lidhen me alarmet e detektimit të zjarrit.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.