Skema e re/ “Dynden” fermerët, 8200 aplikime në pak orë – Jaupllari: Formalizimi, elementi kryesor për subvencion

Në nisje të aplikimeve për mbështetje financiare në bujqësi, interesi ka qënë mjaft i lartë nga fermerët. Deri në orën 12:30 minuta janë shënuar 8200 aplikime. I ftuar në studion e lajmeve në SCAN Tv, zëvendësministri i bujqësisë Arjan Jaupllari, ka folur jo vetëm për risitë e skemës kombëtare, por dhe mënyrën e aplikimit, fazën e verifikimit etj, ku sipas tij elementi kryesor është formalizimi.

“Duhet formalizim! Kemi patur disa pyetje se nuk ma japin tokën, por duhet patjetër ta kenë me një kontratë noteriale, ku të kuptojë dhe ai që jep tokën me qira. Përfitimin do e marë ai që e punon tokën, ai që e mbjell. Dhe pikat e grumbullimit janë një element kryesor në këtë zinxhir, por dhe aty ka informalitet sepse nuk përdoret fatura. Prandaj, formalizimi është i rnëdësishëm në gjithë zinxhirin ekonomik”- thekson Jaupllari.

Sipas Jaupllarit, fermerët mund të përfitojnë deri në mbyllje të aplikimeve në datën 15 prill, duke patur ende kohë për t’u bashkuar. Për të përfituar naftën falas, fermeri duhet të ketë mbi 1 hektar tokë të kultivuar apo që do të kultivojë një nga kulturat bujqësore të stinës. Por kjo nuk është përjashtuese pasi edhe ai fermer që nuk e ka këtë sipërfaqe duhet të bashkohet me fermerë të tjerë dhe të plotësojnë sipërfaqen prej 1 hektarësh. Në këtë mënyrë përfitojnë të gjithë aplikantët sipas sipërfaqes së tokës që kanë të deklaruar me dokumenta.

“Ne kemi shtuar disa avantazhe për këtë vit, bashkimi është një element kryesor. Është një bashkim vullnetar shumë i thjeshtë me një marrëveshje bashkëpunimi me njëri-tjetrin, p.sh ne kemi nga 30 kokë dele, bashkohemi bëjmë një deklaratë dhe aplikojmë në emër të këtij grupimi përshembull prej shtatë fermerësh, secilit më pas do t’i vijnë paratë në llogaritë e tij në bazë të numrit të krerëve. Dhe kjo është diçka shumë e thjeshtë, nuk shkon as tek noteri, pra nuk ka shpenzime. Ne i bëjmë këto sepse nesër duhet patjetër të kemi disa akte më juridike, vërtet që kanë vlerë ligjore edhe për të shkuar për të aplikuar edhe tek fondet e tjera” – shton zëvendësministri Jaupllari.

Një tjetër risi për përfitimin e naftës falas nga shteti është edhe marrja e sasisë së naftës në vlerë monetare. Ndryshe nga vitet e kaluara ku fermerët merrnin kartat e karburantit, këtë vit do të marrin para sipas sasisë përfituese në vlerën e tregut. Për këtë, të gjithë fermerët që do të aplikojnë për subvencione në bujqësi duhet patjetër të paraqesin edhe një llogari të tyre bankare. Nga skema e subvencioneve përgjatë vitit 2023 përfituan 65,000 fermerë, ndërsa këtë vit synohet të tejkalohet 70,000 përfitues apo 77% të gjithë fermerëve të regjistruar në vend.

Alida Lula /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.