Studentët kërkojnë mbështetje financiare – “100 euro si Kosova. Tarifat e universiteteve, ushqimet dhe qiratë janë shumë të larta”

Të papërfshirë  edhe në paketën e dytë antikrizë të prezantuar nga qeveria, studentët kërkojnë nga qeveria mbështetje. Në shenjë proteste organizatat studentore janë mbledhur këtë të premte përpara kryeministrisë për ti drejtuar problematikat aktuale që të rinjtë kanë.

“Edhe pse një shtet i vogël me më pak shpenzime për studentët , Kosova i përfshiu në paketën e antikrizës duke vendosur shpërndarjen e 100 eurove. Në vendin tonë kjo gjë nuk bëhet. Mbi të gjitha kemi një kartë student që ofron shërbime që për ne nuk kanë vlerë dhe nuk plotëson nevojat tona. Të vihet në funksion  karta e studentit siç duhet. Qiratë nga ana tjetër janë të papërballueshme teksa shohim se edhe në Astir një zonë e largët nga universitetet qiratë janë mbi 300 euro. Për të mos folur më tej për tarifat e masterit ku një master shkon deri në 1 milion e 700 mijë lekë”, u shpreh Gevio Tabaku, aktivist.

Studentët shprehen se qeveria nuk po investon siç duhet teksa përmendin tenderat dekorativ miliarda lekë duke lënë mënjanë këtë shtresë të shoqërisë.

“Bëhen miliarda lekë instalacione zbukurimi në mes të kryeministrisë, nga ana tjetër ka miliona euro për koncerte po ska fonde për arsimin”, u shpreh Migen Qiraxhi, aktivist.

Teksa universitetet fillojnë në mes të tetorit studentët kërkojnë që qeveria të marrë një vendim përpara vitit akademik do të mblidhen në protesta.

Marinela Lina / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.