Stuhia në Detin e Zi mbështet naftën – Investitorët po presin edhe takimin e OPEC+ të enjten
Çmimet e naftës u rritën ndjeshëm në sesionin e sotëm, pasi një stuhi në rajonin e Detit të Zi ndërpreu eksportet e naftës nga Kazakistani dhe Rusia, duke rritur frikën e tkurrjes së furnizimit.
Gjithashtu, investitorët po presin edhe vendimet e OPEC+ të enjten, që mund të vendosë të thellojë ose zgjasë shkurtimet e prodhimit. Nafta Brent e Londrës po tregtohet në rreth 82 dollarë për fuçi, ndërsa nafta Bruto amerikane po tregtohet në rreth 77 dollarë për fuçi.
Të dyja kontratat u rritën me rreth 2% në sesionin e kaluar, për shkak të mundësive që Organizata e Vendeve Eksportuese të Naftës dhe aleatët e tjerë si Rusia, që ndryshe njihen si OPEC+, të thellojnë shkurtimet e furnizimit. Në rritjen e çmimeve po ndikon edhe një dollar më i dobët. Një stuhi e fortë që goditi rajonin e Detit të Zi ka ndërprerë rreth 2 milionë fuçi naftë në ditë të eksporteve të naftës nga Kazakistani dhe Rusia.
Fushat e mëdha naftëmbajtëse në Kazakistan po ulin prodhimin e kombinuar ditor të naftës me 56% që nga 27 nëntori, tha ministria e energjisë në vend. E gjithë vëmendja e investitorëve do të jetë e perqëndruar te vendimet e OPEC+ dhe te perspektiva e kërkesës deri në fundit të këtij viti. Parashikohet që bisedimet brenda grupit të jenë të vështira dhe një përmbysje e marrëveshjes së mëparshme është e mundur, thanë katër burime të OPEC+.
Ndërkohë, dollari amerikan po qëndron në nivelin më të ulët në 3 muajt e fundit, përballë shportës me monedhat kryesore ndërkombëtare, pasi pritet të Rezerva Federale të fillojë uljen e interesave në gjysmën e parë të vitit të ardhshëm.
Një dollar më i dobët zakonisht i mbështet çmimet, pasi e bën naftën më të lirë për ata që mbajnë monedha të tjera. Ndër zhvillimet e tjera, rezervat e naftës bruto në SHBA ranë me 817,000 fuçi javën e kaluar, sipas të dhënave të Institutit Amerikan të Naftës. Investitorët po presin të dhënat zyrtare që publikohen nga Administrata për Informimin mbi Energjinë, më vonë gjatë ditës së sotme.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.