Tatimet nxjerrin buxhetin me rekord suficiti – 48 mld lekë në 8-mujor. Kompensohet humbja e doganave

Buxheti i shtetit ka rritur arkëtimet me 12.9 për qind përgjatë periudhës Janar-Gusht 2023, ku të ardhurat janë regjistruar në 425 miliardë lekë.  Referuar treguesve fiskale të Ministrisë së Financave, performanca në vjeljen e taksave ka bërë që suficiti në buxhet të arrijë nivel rekord në 47.8 miliardë lekë, me një rritje drastike krahasuar me një vit më parë në 234%, ku rezultonte 14.3 miliardë lekë.

Por duket se “flamurin” e rritjes së të ardhurave e kanë marrë tatimet, pasi të hyrat nga doganat shënojnë rënie, e cila vjen kryesisht nga çmimet dhe kursi i këmbimit. Kështu,  të ardhurat doganore u realizuan në vlerën 141.4 miliardë lekë, apo  2.4 miliardë lekë më pak 8 mujori 2022, si dhe 10 miliardë lekë më pak se plani.

TVSH-ja në import ka pësuar rënie në 5.2 për qind më pak se një vit më parë dhe janë arkëtuar në total 95.3 miliardë lekë. Nga renta minerare po ashtu janë mbledhur 2 miliardë lekë, apo 33.5 % më pak krahasuar me 8 mujorin 2022. Nga akciza janë arkëtuar 38.2 miliardë lekë, me rritje 9.9 për qind në raport me në vit më parë dhe nga taksat doganore janë arkëtuar 5.9 miliardë lekë, apo 7.3 për qind më shumë se një vit më parë. Ajo që vihet re është se përveç taksave doganore, zërat e tjerë janë të gjitha në rënie në raport me planin.

Sa i takon të ardhurave tatimore, për 8 mujorin 2023 u realizuan në masën 226.6 miliardë lekë, 35.3 miliardë ose 18.4% më shumë se 8 mujori i vitit të kaluar, si dhe 22.6 miliardë lekë, ose 11.1% më shumë se plani.  Të ardhurat nga TVSH e arkëtuar (neto), u realizua në masën 30.9 miliardë lekë, ose 23.8% më shumë se 8 mujori 2022, si dhe 3.5 miliardë omë shumë se plani. Ndikim kryesor duket të ketë dhënë sezoni i turizmit, duke rritur ndjeshëm konsumin në vend.

Të ardhurat e mbledhura nga tatimi mbi fitimin u realizuan në masën 40.9 miliardë lekë, 36.2% më shumë se 8 mujori 2022, si dhe 30% më shumë në raport me planifikimin.  Nga tatimi mbi të ardhurat personale janë arkëtuar 39.3 miliardë lekë me një kapërcim prej  8.7 milardë lekë në raport me një vit më parë. Të ardhurat e mbledhura nga kontributet për sigurimet shoqërore dhe shëndetësore (të administruara nga DPT), u realizuan në masën 91.1 miliardë lekë, 13.7 miliardë lekë më shumë se 8 mujori 2022. Me rritje në raport me një vit më parë janë dhe taksat nacionale, edhe pse jo në planifikimin e bërë.

Shpenzimet e përgjithshme publike, u realizuan masën 92.8 për qind të planit të periudhës, ndërsa krahasuar me të njëjtën periudhë të vitit 2022 ky zë ka rezultuar 15.1 miliardë lekë më shumë.

Elisabeta Dosku/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.