“Tavani i borxhit” mbështet bursat – Pritet votimi edhe në senat, afati i fundit është 5 qershori

Bursat europiane janë hapur në rritje në sesionin e sotëm, ndërsa një ditë më parë prekën nivelin më të ulët në 2 muajt e fundit. Humori i investitorëve është përmirësuar nga votimi i projektligjit për rritjen e tavanit të borxhit në Dhomën e Përfaqësuesve në SHBA.

Indeksi pan-Europian Stoxx 600 e ka nisur ditën në rritje me 0.5%, ndërsa sektori i shitjeve me pakicë kryeson fitimet, në rritje me 1.2%. Investitorët po presin të dhënat mbi inflacionin për Eurozonën, që do të publikohen më vonë gjatë ditës së sotme.

Ekonomistët e anketuar nga Reuters parashikojnë një ngadalësim të inflacionit në 6.3%, gjatë majit, nga 7% që ishte në prill. Në fokus të tregjeve tashmë do të jetë votimi i projektligjit për rritjen e tavanit të borxhit në Senat.

Të mërkurën, me 314 vota pro dhe 117 kundër, Dhoma e Përfaqësuesve e kaloi pezullimin e borxhit prej 31.4 trilionë dollarë. Afati i fundit për të votuar këtë dokument është data 5 qershor, në të kundër qeveria ferderale në SHBA do ta ketë të pamundur të paguajë detyrimet e saj.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.