Temperaturat e larta shënojnë rekorde të reja – Java e parë e korrikut më e nxehta e regjistruar ndonjëherë

Java e parë e korrikut ishte më e nxehta e regjistruar ndonjëherë, sipas të dhënave të organizatës metereologjike botërore. Vendet më të goditura nga vala e të nxehtit janë ato në Europën jugore, ku temperaturat shkojnë mbi 40 gradë. Ndërkohë sipas parashikimeve kjo javë pritet të shënojë rekorde të reja me Francën, Spanjën dhe Italinë që janë vendet më të rrezikuara

Situata e klimës në botë vijon të krijojë shqetësime: java e parë e korrikut, sipas të dhënave të Organizatës metereologjike botërore të OKB – së, ishte më e nxehta e regjistruar ndonjëherë.

Një rekord, pas temperaturave të larta të regjistruara dhe në muajin qershor, i karakterizuar nga një thatësi e fortë në Spanjë dhe valë të nxehti në Kinë dhe Shtete të Bashkuara të Amerikës. Sipas të dhënave të OKB – së, temperaturat e larta po ndikojnë jashtëzakonisht keq, me pasoja shkatërruese mbi ekosistemet dhe ambientin.

Kryesisht vendet më të goditura nga vala e të nxehtit janë ato në Europën jugore, ku temperaturat shkojnë mbi 40 gradë. Ndërkohë sipas parashikimeve kjo javë pritet të shënojë rekorde të reja me Francën, Spanjën dhe Italinë që janë vendet më të rrezikuara. Temperaturat ekstreme dotë pasohen nga stuhi të forta në shumë zona si pasojë e lagështirës së madhe. Por temperatura rekord janë shënuar dhe në veri të Afrikës ku një ditë më parë në Tunizi temperatura maksimale ishte 48.9 gradë.

Në vitin 2022 ishin 61 mijë viktimat si pasojë e temperaturave ekstreme.  Italia ishte vendi më i gpditur me 18 mijë viktima, pjesa më e madhe e të cilave ishin gra.

Sipas studimeve të bazuara në të dhënat ie Eurostat, rritja e numrit të viktimave është në proporcin të drejtë me rritjen e temperaturave. Sipas parashikimeve, pa masa parandalimi pasojat janë dramatike: parashikohen deri në 68 mijë viktima deri në 2030 – ën, për të arritur në 94 mijë në 2040 – ën dhe 120 mijë në 2050 – ën.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.