Mbyllja e bizneseve të dielave – Ekonomia në Kroaci shënon rënie drastike

Implementimi i ligjit më të ri për tregtinë në Kroaci, i cili ndër të tjera ndalon hapjen e pjesës më të madhe të bizneseve të dielave, ka ulur në mënyrë të ndjeshme numrin dhe vlerën e faturave fiskale në sektorin e tregtisë, në dy javët e para të korrikut. Sipas të dhënave të Administratës Tatimore kjo ka shkaktuar një rënie drastike të të ardhurave

Zbatimi i Ligjit të ri për Tregtinë në Kroaci, ka ulur ndjeshëm numrin dhe vlerën e faturave fiskale në tregti për dy javët e para të korrikut, sipas të dhënave të Administratës Tatimore.

Që nga zbatimi i dispozitave të reja ligjore që kufizojnë funksionimin e dyqaneve, në sektorin e tregtisë me shumicë dhe pakicë janë lëshuar 5.02 milionë fatura me vlerë totale mbi 80 milionë euro, sipas të dhënave nga Administrata Tatimore.

Sipas të dhënave nga sistemi i fiskalizimit, thuhet se në muajin korrik, në tregtinë me shumicë dhe pakicë, si dhe në riparimin e mjeteve motorike dhe motoçikletave, janë fiskalizuar gjithsej 2.38 milionë fatura, vlera e të cilave ka arritur në 37,5 milionë euro.

Krahasuar me javën e parë të korrikut të vitit të kaluar, kur janë lëshuar gjithsej 3.03 milionë fatura fiskale, me një vlerë totale prej 44.5 milionë euro, më 2 korrik të këtij viti janë lëshuar 650.6 mijë fatura më pak ose 21.4 %, me vlerë më të vogël se 16 % ose 7.03 milionë euro.

Në javën e dytë të korrikut të këtij viti, më 9 korrik, janë lëshuar gjithsej 2.63 milionë fatura, shuma e të cilave ka arritur në 43.1 milionë euro, ndërsa në javën e dytë të korrikut të vitit të kaluar, në tregti janë fiskalizuar 3.06 milionë fatura me një vlerë totale prej 44.4 milionë euro.

Në javën e fundit para hyrjes në fuqi të ndryshimeve ligjore, më 25 qershor të këtij viti, numri i llogarive fiskale ishte 2.86 milionë, dhe shuma totale e tyre ishte 46.5 milionë euro.

Mediat kroate raportojnë se më 1 korrik hyri në fuqi Ligji i ri i Tregtisë, sipas të cilit dyqanet do të mbyllen kryesisht të dielave, por tregtarët mund të zgjedhin 16 javë të vitit gjatë të cilave do të punojnë.

Përjashtim nga ndalimi i punës të dielave janë objektet e shitjes në stacionet hekurudhore dhe të autobusëve, aeroportet dhe portet, tragetet dhe pikat e karburantit, si dhe në spitale, hotele, institucione kulturore dhe fetare dhe muze.

Dyqanet brenda qendrave të vizitorëve, fermat familjare dhe zonat e mbrojtura në natyrë lejohen gjithashtu të funksionojnë në përputhje me rregullore të veçanta.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.