Tenderët, APP gjobit punonjësit e institucioneve – Vendosen 130 masa administrative, u verifikuan 3.8% e procedurave të zhvilluara

130 punonjës të institucioneve shtetërore janë gjobitur nga Agjencia e Prokurimit Publik për shkelje të kryera në procedurat tenderuese, gjatë vitit 2022. Masat janë caktuar në përfundim të verifikimeve të kryera nga APP, për 177 tenderë të zhvilluar vitin që kaloi, teksa proceduart e verifikuara përbëjnë rreth 3.8% të të gjithë prokurimeve publike të zhvilluara në periudhën janar – dhjetor 2022. Ndërkaq, sa i takon shkeljeve të konstatuara ato variojnë nga mangësi të aspektit procedurial, deri te ato me karakter thelbësor.

Këtu përfshihet përcaktimi i kritereve të veçanta apo specifikimeve teknike që pengojnë pjesëmarrjen e gjerë të operatorëve ekonomikë, si dhe kualifikim i gabuar i operatorëve ekonomikë. Gjithashtu, në disa procedura ka rezultuar mosplotësim i formularëve të deklarimit mbi gjendjen e konfliktit të interesit sipas rregullave të prokurimit publik.

Konkretisht, ka rezultuar se, anëtarë të komisionit të vlerësimit të ofertave kanë nënshkruar deklaratat përkatëse lidhur me ofertuesit pjesëmarrës, përpara ditës së hapjes së ofertave, duke e bërë këtë deklarim formal, pasi në datën e deklarimit anëtarët e komisionit të vlerësimit të ofertave nuk kanë pasur dijeni mbi ofertuesit pjesëmarrës.

Sipas Agjencisë së Prokurimit Publik, fondi i prokuruar për vitin 2022 ishte rreth 134.3 miliard lekë, ndërkohë që fondi i kursyer është vetëm 8.4% e tij, çka tregon se tenderët fitohen me vlera afër fondit limit.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.