Tregjet europiane, në rënie – Investitorët presin komentet e Powell në kongres

Tregjet europiane janë hapur në rënie të lehtë në sesionin e sotëm, ndërsa tregtarët po presin dëshminë e shefit të Rezervës Federale, Jerome Powell në Kongresin amerikan, sot dhe nesër. Indeksi pan-Europian STOXX 600 e ka nisur ditën në rënie të lehtë me 0.3%, ndërsa sektori i teknologjisë kryeson humbjet, në rënie me rreth 0.7%.

Powell pritet të japë detaje në lidhje me të ardhmen e normave të interesit në SHBA, por edhe mbi gjendjen e ekonomisë. Ai pritet të bindë ligjvënësit se Rezerva Federale është e vendosur të ulë inflacionin, pa dëmtuar pjesën tjetër të ekonomisë amerikane.

Ndërkohë, shumica e tregjeve aziatike kanë pasur një performancë mikse. Referuar të dhënave në Kinë, eksportet ranë me 6.8% gjatë shkurtit, ndërsa analistët parashikonin një rënie me 9.4%. Gjithashtu, edhe importet ranë me 10.2%, dyfish më shumë se parashikimet e tregjeve për një rënie me 5.5%. Investitorët po presin edhe të dhënat mbi inflacionin në Irlandë dhe fitimet tremujore të korporatave.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.