Tregu i brendshëm valutor gjen stabilitet – Edhe në tregjet ndërkombëtare, euro e qëndrueshme pranë 1.095 USD

Tregu i brendshëm valutor duket se ka gjetur një stabilitet, pas forcimit të monedhave kryesore ndërkombëtare, për 5 sesione me radhë. Edhe në tregjet ndërkombëtare monedhat po tregtohet tw qwndrueshme, pasi investitorët po presin të dhënat mbi inflacionin në SHBA.

Tregu i brendshëm valutor duket se ka gjetur një stabilitet të ri, pas forcimit për 5 sesione me radhë të monedhave kryesore ndërkombëtare. Tashmë, euro është stabilizuar në intervalin nga 103.5 deri në 104.5 lekë, ndërsa aktorët e tregu po presin për të tjerë katalizatorë për të qënë më aktivë me blerjen dhe shitjet e monedhave.

Sipas agjencisë së këmbimit valutor, Iliria 98, euro blihet me 103.6 dhe shitet me 104.5 lekë, dollari blihet me 94.5 dhe shitet me 95.6 lekë, franga zvicerane blihet me 110.7 dhe shitet me 111.7 lekë, ndërsa paundi britanik blihet me 120 dhe shitet me 121 lekë.

Ndërkohë, në tregjet ndërkombëtare euro po shfaqet e qëndrueshme edhe në sesionin e sotëm, pasi investitorët po presin të dhënat mbi inflacionin në SHBA, që do të publikohen këtë javë dhe do të përcaktojnë rrugën që do të ndjekë Rezerva Federale, në lidhje me normat e interesit. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102.5, ndërsa javën e kaluar u rrit me 1%.

Investitorët janë të fokusuar tek të dhënat e rishikuara mbi inflacionin në SHBA, që do të publikohen të enjten dhe do të qartësojnë më shumë hapat e Rezervës Federale, për uljen e interesave. Analistët parashikojnë se inflacioni do të jetë rritur me 0.2% me bazë mujore dhe me 3.2% me bazë vjetore. Tregjet vlerësojnë 64% shanse që Rezerva Federale të ulë normën bazë të interesit në muajin mars, nga 80% që vlerësohej në fund të javës së kaluar.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.