Turizmi “thyen” pritshmëritë edhe në Gusht – Një turist qëndroi mesatarisht tre netë në strukturat akomoduese

Sipas INSTAT, shifrat tregojnë se gjatë muajit Gusht 2023, numri i vizitorëve gjithsej regjistrohet 492,929 duke shënuar kështu rritje me 64.4%, krahasuar me Gushtin e vitit të kaluar.

Nëse i analizojmë vizitorët sipas tipologjisë vihet re se rritja më e lartë i atribuohet turistëve vendas të cilët në numër janë 185,942 dhe rritja vjetore shënohet në 65.6%. Ndërkohë, numri i vizitorëve të huaj ishte 306,987 duke reflektuar kështu  rritje me 63.7%. Krahasimisht me një vit më parë rritja është krejtësisht e dukshme jo vetëm për numrin e vizitorëve por edhe për numrin e netëve të qëndrimit.

“Scan Intel” është ndalur në analizën e vizitorëve sipas rajonit ku për muajin Gusht, Rajoni i Veriut ka qenë ai që ka shënuar rritjen më të lartë me 2 herë.  Përkatësisht kanë zgjedhur këtë rajon 55,189 vizitorë vendas dhe 110.419 vizitorë të huaj, ndërkohë që në Zonat Bregdetare ky tregues  është rritur me 77.1% krahasuar me të njëjtën periudhë të vitit të mëparshëm

Ashtu si për vizitorët edhe për netët e qëndrimit reflektohet një rritje e konsiderueshme me 58.5% krahasuar me muajin Gusht të vitit 2022. Numri total i netë qëndrimeve rezulton të jetë 1.5 milionë, ku janë regjistruar respektivisht rreth 500 mijë netë qëndrimi nga vizitorët rezident dhe 1 milionë nga vizitorë të huaj. Numri i netë qëndrimeve të vizitorëve jo-rezident të cilët janë akomoduar në Rajonin e Veriut ka shënuar rritjen më të lartë me 91.2%. Në Zonat Bregdetare ky tregues është rritur me 52.6%, krahasuar me të njëjtën periudhë të vitit të mëparshëm. Gjatë këtij muaji, norma e shfrytëzimit të dhomave të “Hoteleve dhe akomodimeve të ngjashme” është 55.3%, kundrejt 44.3% që ishte në muajin Gusht 2022.

Ndërkohë vizitorët të cilët kanë zgjedhur si destinacion pushimi Shqipërinë në muajin Gusht vinin nga shtete të ndryshme, ku 14.8% e tyre janë nga Kosova, 8.9% nga Italia, 6% nga Polonia,  ndërsa vizitorët nga Gjermania zinin 5.4%.

Armela Duka / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.