Turqi, norma bazë e interesit rritet në 45% – Banka Qendrore, në luftë me inflacionin dyshifror prej 65%
Banka Qendrore e Turqisë e ka rritur normën bazë të interesit edhe me 250 pikë bazë, duke e çuar në totalin e 45%. Vendimi i bankës qendrore ishte në linjë me parashikimet e tregjeve dhe vjen në një kohë që Turqia përballet me një inflacion dyshifror. Inflacioni në vend u rrit në 64.8% me bazë vjetore, gjatë dhjetorit të vitit të kaluar, nga 62% që ishte në nëntor.
Në anën tjetër, edhe lira turke ka rënë në një nivel të ri rekord, përballë dollarit amerikan, duke thyer kufirin e 30 lirave për një dollar. Analistët parashikojnë se, kjo ishte rritja e fundit, të paktën edhe për pak kohë, sidomos për shkak të afrimit të zgjedhjeve lokale, që do të mbahen në mars.
Vendim i Bankës Qendrore të Turqisë, është i fundit në serinë e 8 rritjeve me radhë, që nga zgjedhjet e majit të vitit 2023. Ky shtrëngim i politikës monetare ka qenë i dhimbshëm për turqit, ndërsa vendi përballet me një monedhë të dobësuar në mënyrë dramatike dhe me kostot e jetesës në rritje.
Vitet e inflacionit të lartë janë kryesisht rezultat i politikës monetare lehtësuese kokëfortë, jo nga banka qendrore sikurse duhej të ndodhte normalisht, por nga qeveria e Ankarasë zyrtare.
Lira turke ka rënë me 38% kundrejt dollarit amerikan, në harkun e një viti, ndërsa ka humbur më shumë se 80% të vlerës, gjatë pesë viteve të fundit. Presidenti Erdogan ndryshoi kursin e politikave të tij ekonomike pasi fitoi një mandat të tretë në zgjedhjet e majit, ndërsa emëroi një ekip të ri ekonomik të kryesuar nga ish-bankieri i Merrill Lynch, Mehmet Simsek, i cili u kthye si ministër i financave.
Hafize Gaye Erkan, një ish-drejtuese bankare në SHBA, mori postin e Guvernatores së Bankës Qendrore në qershor, duke u bërë gruaja e parë që mban këtë pozicion në Turqi. Gjatë mandatit të saj, kostot e huamarrjes janë rritur nga 8.5% në 45% aktualisht.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.