Ulja e çmimit të energjisë për ujësjellësit – Zbardhet shkresa: Të rekuperojnë borxhet ndaj OSHEE, garantohet aktiviteti financiar!

Ulja e çmimit të energjisë për ujësjellësit duhet të pasohet me rekuperimin e borxhit që këto kompani kanë ndaj Operatorit të Shpërndarjes së Energjisë Elektrike. TV SCAN ka siguruar shkresën e Koorporatës Elektroenergjetike Shqiptare, që argumenton vendimin për uljen e çmimit të shitjes për këtë kategori abonentësh.

KESH citon kërkesën e Agjencisë Kombëtare të Ujësjellës Kanalizime dhe Ministrisë së Infrastrukutrës dhe Energjisë, mbi nevojën e shoqërive UK për aplikimin e tarifimit të veçantë me qëllim garantimin në aspektin financiar të veprimtarisë së shoqërive të UK, përfshirë rikuperimin e borxhit”. Bazuar në këtë kërkesë, KESH miratoi çmime më të ulta për ujësjellësit e lidhur në tensonin 35 KV si dhe 20/10/6 kV, që furnizohen nga Furnizuesi I Mundësisë së Fundit, duke bërë që çmimi final i miratuar nga Enti Rregullator i Energjisë të pësojë rënie.

Sipas vendimit të ERE-s, ujësjellësit e lidhur në tensionin 35 KV do e paguajnë energjinë elektrike me 9.33 lekë/kWh, ndërsa të lidhurit në tensionin 20, 10 dhe 6 KV do e pagujanë 11.77 lekë/kWh. Ky favorizim erdhi pas reformës në sektorin e ujësjellës-kanalizime, që i kaloi 51% të aksioneve Ministrisë së Infrastrukturës dhe Energjisë, si dhe pas një rritje të ndjeshme të detyrimeve të papaguara që kanë këto ndërmarrje për energjinë.

Sipas të dhënave të fundit të disponueshme, vlera e faturave të palikujduara arrin në rreth 18.1 mld lekë, shifra më e lartë e akumuluar ndonjëherë nga institucionet jobuxhetore, të paktën që nga vitin 2010, kur gjithsesi borxhi ishte ndjeshëm më i ulët se vlerat e sotme me rreth 2.7 mld lekë të papaguara.

Periudha, kur borxhet e ujësjellësve ishin në nivele më të ulta është maj – korrik 2015, me 1.5 – 1.9 mld lekë, e ndikuar nga fshirja e detyrimeve të prapambetuara që u ndëmor në vitin 2014. Ndërkohë që, pas korrikut 2015 tendenca për të mos paguar energjinë e konsumuar ka qenë vetëm në rritje.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.