UNESCO paralajmëron: Ky qytet italian është në telashe!

UNESCO ka rekomanduar që një nga destinacionet turistike më të njohura dhe më të brishta në Itali t’i shtohet listës së rrezikut të trashëgimisë.

Organizata e Kombeve të Bashkuara për Arsim, Shkencë dhe Kulturë po i bën thirrje qeverisë italiane të “sigurojë përkushtimin maksimal” për të trajtuar “problemet e vjetra” në Venecia, e cila ka vite që po përballet me shumë turistë dhe efektet e ndryshimeve klimatike.

Venecia është një nga 1,157 vendet e përcaktuara aktualisht si një sit i Trashëgimisë Botërore, të cilat kanë “vlerë të jashtëzakonshme universale” për shkak të ofertave të tyre kulturore ose natyrore.

Rekomandimi për vendosjen e Venecias në listën e Trashëgimisë Botërore në Rrezik është bërë nga UNESCO dhe ekspertë të organeve këshillimore në axhendën e saj të përkohshme përpara sesionit të 45-të të Komitetit të Trashëgimisë Botërore të agjencisë, i cili është planifikuar të mbahet në Riad, Arabi Saudite, në shtator.

Projekt-rezoluta argumenton se nuk ka pasur një “nivel të rëndësishëm progresi në adresimin e çështjeve të vazhdueshme dhe komplekse që lidhen veçanërisht me turizmin masiv, projektet e zhvillimit dhe ndryshimet klimatike”.

Në draft rezolutë thuhej se këto çështje po shkaktojnë “përkeqësim dhe dëmtim të strukturave të ndërtesave dhe zonave urbane, duke degraduar identitetin kulturor dhe social të pronës dhe duke kërcënuar integritetin e atributeve dhe vlerave të saj kulturore, mjedisore dhe peizazhore”.

Venecia është përballur me një situatë të vërtetë të problemeve të motit në vitet e fundit.

Në shkurt të këtij viti, qyteti ishte në mbërthimin e një thatësire aq të madhe, saqë gondolat, taksitë e ujit dhe autoambulancat e kishin të pamundur të kalonin nëpër disa kanale. Në nëntor 2019, përmbytjet ishin aq të këqija sa u rrezikuan thesaret dhe ndërtesat historike.

Mbi-turizmi në Venecia ka qenë një çështje e vazhdueshme dhe UNESCO vuri në dukje disa nga përpjekjet e vendosura për ta luftuar atë, siç është ndalimi i anijeve të mëdha për të hyrë në pellgun e San Marco, Kanali Giudecca. Megjithatë, raporti tha se “efektet e përkeqësimit të vazhdueshëm për shkak të ndërhyrjes njerëzore, duke përfshirë zhvillimin e vazhdueshëm, ndikimet e ndryshimeve klimatike dhe turizmit masiv kërcënojnë të shkaktojnë ndryshime të pakthyeshme në OUV [vlera e jashtëzakonshme universale]” e Venecias.

Bashkia e Venecias tha se “do të lexojë me kujdes vendimin e propozuar të publikuar sot nga Komiteti i Trashëgimisë Botërore të UNESCO-s dhe do të shkëmbejë mendime me qeverinë, e cila është shteti palë me të cilin ndërvepron UNESCO”.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.