“Vërshimi” i eksporteve kineze shqetëson Perëndimin – Pekini kompenson konsumin e dobët dhe krizën e strehimit

Fabrikat kineze do të vazhdojnë të prodhojnë mallra të shumta pavarësisht deklaratave të fundit të sekretares amerikane të Thesarit, Janet Yellen. Ajo ishte e fundit në mesin e zyrtarëve të lartë të qeverisë perëndimore që paralajmëroi Pekinin kundër minimit të bizneseve perëndimore duke përmbytur tregjet me eksporte të lira. Megjithatë, mbiprodhimi industrial do të vazhdojë për një kohë të gjatë.

Sot, politikëbërësit si në SHBA, njësoj dhe në Europë, shqetësohen për mbiinvestimin e Kinës në makina elektrike, panele diellore, bateri litium-jon dhe industri të tjera, të cilat do të shtyjnë nivelet e prodhimit shumë përtej kërkesës së brendshme. Pekini është zotuar të frenojë prodhimin e tepërt, ndërsa i quajti protestat perëndimore të gabuara.

Megjithatë, ato janë pjesërisht të justifikuara. Sipas Agjencisë Ndërkombëtare të Energjisë, prodhuesit e paneleve diellore kontrollojnë më shumë se 80% të tregut, duke tejkaluar shumë pjesën e Kinës prej 36% të kërkesës globale. Industria e baterive prodhoi 747 gigavat-orë në vitin 2023, gati dyfishi i 387 gigavat-orëve të instaluara në produktet e blera në Kinë.

Duket se ky mbizgjerim i aktivitetit ekonomik është veçanërisht i përhapur. Në fillim të vitit 2023, kapaciteti total rezervë ra nën 75%, herën e parë që nga viti 2016. Kjo rënie nuk është vërejtur vetëm në industritë që lidhen me pasuritë e paluajtshme, por edhe në industrinë ushqimore, veshjesh, kimike dhe farmaceutike.

Në të njëjtën kohë, nivelet e inventarit ishin rritur. Kjo është kryesisht për shkak të shtytjes së Pekinit për industrinë për të nxitur rritjen për të kompensuar konsumin e dobët dhe një krizë të vazhdueshme strehimi.

Kreditë e biznesit në katër bankat më të mëdha shtetërore të vendit u rritën me 25% në vitin 2023 në 1.2 trilionë dollarë, të drejtuar kryesisht në sektorët strategjikë të teknologjisë së lartë dhe energjisë së gjelbër, të cilët vitin e kaluar kontribuan me të ardhura rekord prej 1.6 trilionë dollarë, që përbën 40% të rritjes së PBB-së së Kinës.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.