Vizat e arta, Greqia i jep më shumë kohë vetes – Afati për pragun prej 250 mijë euro shtyhet deri në fund të korrikut

Investitorët nga vendet jashtë BE-së do të kenë edhe tre muaj të tjerë kohë për të siguruar marrëveshje për blerjen e pronave me kufirin aktual të çmimit më të ulët prej 250 mijë euro, duke siguruar në këtë mënyrë lejen e lakmuar të qëndrimit  – Vizën e Artë, por edhe mundësinë për të zgjedhur pronën e tyre para se kostoja minimale të rritet deri 500 mijë euro.

Në ligjin e fundit për kodin e ri të imigracionit të Ministrisë së Politikave të Emigracionit, të botuar në Fletoren e Qeverisë pak ditë më parë, parashikohet një dispozitë që përcakton se afati kohor për nënshkrimin e një marrëveshjeje paraprake  – apo edhe të kontratës përfundimtare të shitjes – në çmimin ekzistues prej 250 mijë eurosh zgjatet nga data 30 prill, që ishte afati deri më tani, deri më 31 korrik.

Deri atëherë, investitorët e interesuar do të mund të vazhdojnë me marrëveshjet për të blerë prona në qendër të Athinës, në periferitë e saj jugore ose veriore me një limit më të ulët investimi prej 250 mijëeurosh. Nga data 1 gusht e në vazhdim dhe për sa kohë nuk jepet një zgjatje e re e afatit, ata që dëshirojnë të marrin leje qëndrimi dhe njëkohësisht duan të blejnë një pronë në zonat e mësipërme, si dhe në Mykonos, Santorini dhe Selanik, do të duhet të investojë të paktën 500 mijë euro. Ata që kanë nënshkruar para – marrëveshjet brenda datës 31 korrik, do të kenë afat deri në fund të vitit 2023 për të vijuar me nënshkrimin e kontratave përfundimtare të shitblerjes dhe të aplikojnë për marrjen e lejes së qëndrimit për veten dhe familjarët e tyre.

Në këtë kuadër, në treg ka një furi blerjesh dhe shitjesh, teksa investitorët përpiqen të respektojnë afatet përkatëse. Kjo situatë nisi shtatorin e kaluar, pak pasi kryeministri  Mitsotakis konfirmoi në Panairin Ndërkombëtar të Selanikut dyfishimin e kufirit të investimit për dhënien e lejes së qëndrimit.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.