2020-2023, për çfarë kanë marrë kredi bizneset? – Dominon blerja e pajisjeve dhe pasurive të paluajtshme, përkatësisht 28% dhe 27% e totalit

Një vlerësim afatmesëm i treguesve të kreditimit tregon se kompanitë në vend u drejtohen më së shumti bankave për të financuar blerjet e pajisjeve dhe pasurive të paluajtshme, ndërkohë që në fund vjen huamarrja për çelje biznesesh të reja.

Referuar të dhënave të Bankës së Shqipërisë, struktura e kredive të bizneseve sipas qëllimit ka mbetur përgjithësisht e pandryshuar duke nisur nga viti 2020. Deri në gjysmën e vitit aktual, rezulton se stoku i kredive të biznesit dominohet nga kreditë për blerje pajisjesh dhe pasurish të paluajtshme me përkatësisht 28% dhe 27%, e më tej nga kreditë-kufi, apo overdraftet  dhe huatë për çelje biznesi që zënë përkatësisht 25% dhe 17%.

Po ashtu, që nga fillimi i vitit 2020, rritja e kredisë për bizneset është ndikuar nga rritja e kredisë për kapital qarkullues dhe e kredisë për blerje pajisjesh, ndërkohë që gjatë vitit 2022, rritja është përcaktuar nga rritja në tepricën e overdraftit.

Gjatë gjithë kësaj periudhe kredia për blerjen e pasurive të paluajtshme ka dhënë kontributin kryesor në zgjerimin e kredisë për bizneset. Teprica e kredisë së marrë nga bizneset në monedhën Euro për të blerë pasuri të paluajtshme u rrit me rreth 20% gjatë vitit 2021 dhe me një shpejtësi mesatare midis 5% dhe 10% që nga fillimi i vitit 2022 deri në mes të vitit 2023. Kredia e marrë për të njëjtin qëllim në monedhën vendase është rritur me ritme të ngjashme gjatë viteve 2021-2022, por u tkurr gjatë gjysmës së parë të vitit 2023.

Të dhënat e Bankës së Shqipërisë tregojnë se biznesi merr nëpër banka rreth 30 mijë kredi çdo vit, ndërkohë që vlera mesatare e kredisë rezulton rreth 16 mijë lekë. Në varësi të qëllimit, vlera mesatare e kredisë shkon në rreth 9 milionë lekë për kredinë e marrë për tregti, në rreth 20 milionë lekë për kreditë e marra për zhvillim biznesi dhe në rreth 30 milionë lekë për kreditë e marra për blerje dhe zhvillim pasurish të paluajtshme.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.