4,7 milionë italianë nuk paguajnë faturat e energjisë – Alarmi i rritjes së çmimeve, fenomeni është më i përhapur në Italinë Qendrore

Për shkak të rritjes së çmimit, 4.7 milionë italianë nuk kanë paguar një, ose më shumë fatura të energjisë elektrike dhe gazit në 9 muajt e fundit. Një numër i destinuar të shtohet nëse çmimet vazhdojnë të rriten. Sipas një anketimi, 3.3 milionë italianë  deklaruan se, në rast rritjesh të mëtejshme, mund ta kishin të pamundur të përballonin situatën e ardhshme me faturat e energjisë.

Situata emergjente është evidente edhe nga një e dhënë tjetër: pothuajse 2 nga 3 të anketuarit që nuk paguajnë (62%) thanë se ishte hera e parë. Sipas anketimit, nëse në nivel kombëtar përqindja e atyre që kanë deklaruar se nuk kanë paguar një ose më shumë fatura në 9 muajt e fundit është e barabartë me 10.7%, fenomeni është më i përhapur në Italinë Qendrore me 11.5% dhe në jug dhe ishuj me 11.2%. Nëse çmimi I energjisë vijon të rritet, zonat më të rrezikuara për të mos paguar janë ato të Jugut me 9.4%, krahasuar me një mesatare kombëtare prej 7.7%.

Ndërkohë, me rritjen e çmimit të energjisë, jo vetëm familjet, por edhe bashkitë po ndërmarrin masa shtrënguese. Ato janë gati të respektojnë planin e hartuar nga Ministria e Tranzicionit të Energjisë, për uljen e konsumit, me shtyrjen në kohë e ndezjes së radiatorëve, uljen e orëve të ngrohjes, temperaturën e brendshme të çuar në 19 gradë celcius.

Tashmë po përgatiten të shkurtojnë sërish, me uljen e kohës së ndriçimit ditor publik, uljen e temperaturave në godinat e bashkisë, punën inteligjente për punonjësit, kërkesën për t’i kushtuar më shumë vëmendje fikjes së kompjuterëve dhe dritave.

Sipas të dhënave, bashkitë italiane shpenzuan 1.6 miliardë euro për energjinë në vitin 2021, ndërsa vlerësohet se mund të ketë një dyfishim për vitin 2022 me 1.7-1.8 miliardë euro më shumë dhe pritet që rritjet të vijojnë edhe në vitin 2023.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.