70% reduktim kamatvonese për borxhlinjtë e energjisë – OSHEE: Në 3 javë kanë përfituar 340 klientë familjarë

Që nga nisja e aplikimit të skemave të reja për likujdimin me këste të detyrimeve të prapambetura ndaj Operatorit të Shpërndarjes së Energjisë Elektrike janë 340 klientë familjarë që kanë përfituar 70% reduktim të kamatëvonesës”.

Sipas skemës së re, që nisi zbatimin në datën 3 prill, klientët familjarë përfitojnë reduktim të kamatëvonesës në masën 70%, në rast të shlyerjes së gjithë detyrimit të krijuar deri në 31 dhjetor 2022. Ndërkohë që, duke marrë në konsideratë faturat e papaguara ndër vite, vlera e kamatave rëndon edhe më shumë debitorët e energjisë.  Gjithsesi, sipas skemave të reja reduktim të kamatëvonensës përfitjnë edhe kategoritë e tjera të klientëve. Kështu, klientët jo familjarë, buxhetorë dhe jo buxhetorë përfitojnë reduktim të kamatëvonesës në masën 50%, në rast të shlyerjes së gjithë detyrimit njëherësh. Veçanti përbën biznesi i vogël, që përfiton reduktim të kamatëvonesës në masën 100%, në rast të shlyerjes së gjithë detyrimit.

Paralelisht me skemën e reduktimit të kamatëvonesave, u miratuan dhe skemat e reja për likujdimin me këste të borxheve, me kushtin që të jenë mbyllur të gjitha detyrimet e krijuara gjatë vitit 2023 e në vazhdin. Përmes këtyre skemave synohet reduktimi i detyrimeve të prapambetura, që deri në fund të vitit 2023 rezultonin në gati 80.9 mld lekë.

“Klientët familjarë janë debitorët më të mëdhenj ndaj OSHEE-së. Sipas të dhënave zyrtare nga Enti Rregullator i Energjisë, deri në dhjetor 2023 kjo kategori numëron si detyrime të papaguara ndaj OSHEE, një vlerë prej 45.4 mld lekë”. 

Pas klientëve familjarë, vjen kategoria e institucioneve jobuxhetore, ku bëjnë pjesë ujësjellësit me 18.9 mld lekë detyrime të papaguara. Pjesa tjetër e borxhit ndahet midis privatëve, me 11.7 mld lekë dhe institucioneve buxhetore me 4.8 mld lekë.

Skema e reduktimit të kamatëvonesës kundrejt likuidimit të plotë të debisë së prapambetur deri në 31 dhjetor 2022

• Klientët familjarë Reduktim të kamatëvonesës në masën 70%
• Klientët jo familjarë, buxhetorë dhe jo buxhetorë Reduktim të kamatëvonesës në masën 50%
• Klientët biznes i vogël Reduktim të kamatëvonesës në masën 100%

Ola Mitre /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.