8 mld dollarë dëme nga cikloni në Zelandën e Re – Prezantohet paketa emergjente e ndihmave prej 187 milionë dollarë

Zelanda e Re konfirmoi se kostoja përfundimtare e ciklonit shkatërrues Gabrielle, i cili shkaktoi të paktën 11 viktima, mund të shkojë mbi 8 miliardë dollarë, pasi autoritetet njoftuan financime emergjente për të ndihmuar në përpjekjet e rimëkëmbjes.

Cikloni goditi rajonin më verior të vendit më 12 shkurt dhe kaloi në bregun lindor, duke shkaktuar shkatërrim masiv. Kryeministri Chris Hipkins e cilësoi si fatkeqësinë më të madhe natyrore të Zelandës së Re në këtë shekull. Ai shtoi se investimi që nevojitet për të rilidhur komunitetet dhe për të mbrojtur infrastrukturën e kombit do të jetë i rëndësishëm dhe do të kërkojë vendime të vështira. Ai prezantoi një paketë ndihme emergjente prej 187 milionë dollarësh.

Paketa e përkohshme siguron një shumë të konsiderueshme për të rregulluar rrugët kryesore nëpër rajonet e goditura nga katastrofa, dhe për bizneset e prodhuesit kryesorë. Ndërkohë pritet më shumë lehtësim dhe financim për rindërtim nga qeveria.

Hipkins zgjati gjithashtu gjendjen e jashtëzakonshme kombëtare, e cila u shpall javën e kaluar vetëm për herë të tretë në historinë e saj, edhe shtatë ditë të tjera për të ndihmuar në rimëkëmbjen. Sipas policisë rreth 2200 rezultojnë ende të zhdukur. Vështirësitë me komunikimin po pengojnë përpjekjet për të krijuar kontakt me njerëzit e prekur.

Zelanda e Re ka vendosur 60 satelitë Starlink, të ndërtuar nga SpaceX në pronësi të Elon Musk, dhe 30 të tjerë në rrugë, për të mbyllur boshllëqet në rrjetin e telekomunikacionit pasi rreth 15 mijë njerëz në të gjithë ishullin e Veriut mbetën pa energji elektrike.

Përpjekjet po vazhdojnë me ekipet e kërkim-shpëtimit që vazhdojnë të punojnë në zonat e dëmtuara nga ciklonet, ndërsa energjia dhe telekomunikacioni mbeten të dëmtuara për shumë shtëpi. Rrugët janë të mbyllura dhe njerëzit po raportojnë probleme në marrjen e parave cash.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.