8 vende europiane kundërshtojnë standardet Euro 7 të emetimeve të makinave – Akuzojnë KE-në për detyrime shtesë

Një koalicion prej tetë vendeve, i udhëhequr nga Çekia, është mbledhur për të shprehur kritika kundër standardeve të propozuara të emetimit të makinave Euro 7.

Sipas Komisionit Evropian, rregullat e standardeve Euro 7 sjellin kufizime të shkarkimeve për të gjitha mjetet motorike, d.m.th., makinat, furgonët, autobusët dhe kamionët sipas një grupi të vetëm rregullash. Rregullat e reja janë neutrale ndaj karburantit dhe teknologjisë, duke vendosur të njëjtat kufizime pavarësisht nëse automjeti përdor benzinë, naftë,  është elektrik ose me lëndë djegëse alternative.

Çekia, Bullgaria, Franca, Hungaria, Italia, Polonia, Rumania dhe Sllovakia kanë nënshkruar një non-paper, i cili i është dërguar presidencës suedeze të Këshillit të BE-së dhe Komisionit Evropian.

Ata akuzojnë Komisionin Evropian se i ngarkon prodhuesit evropianë të makinave me detyrime shtesë që shkojnë përtej kufijve të miratuar më parë të emetimit dhe kalimit në elektromobilitet.

Pavarësisht kritikave të mëparshme për normën Euro 7, Gjermania ka vendosur të mos i bashkohet koalicionit. Mungesa e Gjermanisë mund t’i atribuohet arsyeve të brendshme politike, sipas Hospodářské noviny.

“Ne ishim të parët që përshkruam qartë vitin e kaluar se si Euro 7 është një standard me të meta. Që atëherë, ne kemi organizuar vende të tjera për të mbështetur pozicionin tonë dhe ia kemi dalë”, tha për Hospodářské noviny Ministri çek Martin Kupka (ODS, ECR).

“Ne kemi ndërtuar një aleancë të fortë për një formë më të arsyeshme të Euro 7. Besoj se tetë shteteve aktuale do t’u bashkohen të tjerë dhe se do të jenë më shumë se dhjetë,” shtoi ai.

Koalicioni që kundërshton Euro 7 i sheh kufijtë e propozuar të emetimit si jorealiste, veçanërisht duke marrë parasysh angazhimin e mëparshëm të BE-së për të hequr gradualisht motorët me djegie të brendshme pas vitit 2035.

“Ne kundërshtojmë çdo kërkesë të re të emetimit të shkarkimeve për makinat dhe furgonat pasi ato do të devijojnë investimet e sektorit nga rruga e rënë dakord së fundmi drejt zero emetimeve të CO2 nga makinat”, thuhej në letër.

Koalicioni ka identifikuar shtatë fusha specifike ku ata besojnë se ndryshimet janë të nevojshme.

Kryesorja ndër to është kërkesa për shtyrje të zbatueshmërisë së rregullave të propozuara.

Ndërsa propozimi tregon se standardi i ri i emetimeve për makinat do të hyjë në fuqi në korrik 2025 dhe korrik 2027 për kamionët, koalicioni po avokon për një zgjatje prej të paktën tre vjetësh për makinat dhe pesë për kamionët.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.