80 milionë euro për të “shpëtuar” nga çmimi i energjisë – Ibrahimaj: Granti i BE, për përballimin e krizës. Ndryshojmë buxhetin fillestar

Në kushtet kur qeveria ka paralajmëruar qytetarët shqiptarë se mund të preken nga rritja e çmimit të energjisë elektrike dhe ka kërkuar kursim drastik, Bashkimi Europian ka akorduar për Shqipërinë një grant prej 80 milionë euro për përballimin e efekteve që vijnë nga kriza energjetike.

Ky grant mund të jetë edhe “barka e shpëtimit” për qytetarët dhe bizneset që parashikoheshin të vuanin pasojat e krizës. Por ndërkohë që Komisioni i Ekonomisë dhe Financave është mbledhur për të miratuar në parim buxhetin dhe paketën fiskale për vitin e ardhshëm, Ministrja Delina Ibrahimaj theksoi se shtesa do të pasyrohet në buxhet gjatë diskutimeve nen për nen.

“Pasi sollem buxhetin per shqyrtim ne Komision, kemi marre lajmin qe nga BE do të alokohet një grant ptrej 80 mln euro për mbështejnen e energjisë elektrike i cili nuk është i pasqyruar në buxhet dhe kur të bëjmë rishkimin nen për nen do duhet ta pasqyrojmë dhe këtë element”, tha ajo.

Në projektbuxhetin e vitit 2023, janë parashikuar 12 miliardë lekë si mbështetje e sektorit energjetik. Komisioni ka miratuar në parim buxhetin dhe paketën 2023 së bashku me raportet e komisioneve për dhënie mendimi.

Elisabeta Dosku / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.