Gati nënshkrimi i Konventës për Krimin Kibernetik – Protokolli, më shumë hetime të përbashkëta me partnerët dhe ndërveprim për provat

Vetëm pak kohë pas sulmit ndaj shërbimeve dixhitale në vend, të ardhur nga Irani, Shqipëria është në prag të nënshkrimit të Protokollit të dytë shtesë të Konventës për Krimin Kibernetik mbi Bashkëpunimin e Zgjeruar dhe Zbulimin e Provave Elektronike. Këshilli i Ministrave ka depozituar në Kuvend Projektligjin për nënshkrimin e konventës, e cila është nënshkruar në maj të këtij viti nga shtetet anëtare.

Sipas Qeverisë, Aderimi në këtë protokoll sjell një sërë benefitesh në legjislacionin e brendshëm të Republikës së Shqipërisë në lidhje me rritjen dhe krijimin e hapësirave bashkëpunuese në fushën penale, në hetimin e veprave penale, në fushën kibernetike dhe në shkëmbimin e provave në formë elektronike.

Protokolli i dytë shtesë i Konventës përmban parashikime për lehtësimin e bashkëpunimit mes shteteve palë, për kryerjen e hetimeve për veprat penale që lidhen me sistemet dhe të dhënat kompjuterike dhe me marrjen e provave në formë elektronike.

Nisur nga zhvillimi shumëdimensional i kriminalitetit dhe formave të tij, si dhe i zhvillimeve teknologjike, është e rëndësishme që legjislacioni i brendshëm të përqaset me këto zhvillime, duke mundësuar një bashkëpunim të thjeshtuar me autoritetet e shteteve palë, si dhe marrjen e provave në formë elektronike, argumenton qeveria në relacionin shoqërues të projektligjit.

Përpos aderimit në këtë protokoll të dytë shtesë, është e nevojshme të ndërmerren masa ligjore në aktet e brendshme për përshtatjen e legjislacionit me standardet e vendosura nga protokolli.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.