Serie A synon trefishimin e të ardhurave – E drejta televizive jashtë Italisë parashikon rreth 1.9 miliard euro në 2027-2030

Seria A e Italisë po kërkon të trefishojë të ardhurat e saj nga transmetimet ndërkombëtare deri në vitin 2030 përballë rritjes së ngadaltë në vend, tregon një dokument konfidencial, që pasqyron dëshirën për të ngushtuar hendekun financiar në ligat rivale europiane të futbollit.

Seria A siguroi vetëm rreth 670 milionë euro nga shitja e të drejtave televizive jashtë vendit në periudhën 2021-2024, një e nënta e shumës së fituar jashtë vendit nga Premier League e Anglisë, kompeticioni më fitimprurës në botë i futbollit.

Për të fituar më shumë të ardhura nga tregjet kryesore të mediave të huaja, Serie A ka ngritur një zyrë në Nju Jork dhe planifikon të ngrejë zyra edhe në vende të tjera,  përfshirë Londrën dhe Abu Dhabi, thuhet në dokumentin konfidencial të parë nga Reuters.

Serie A gjithashtu synon të ofrojë paketa në formate të ndryshme, duke përfshirë dokumentarë, duke pasqyruar mënyrën se si një seri e Netflix ka ndihmuar garat e Formula 1 të fitojnë tifozë të rinj.

Sipas një skenari të hartuar nga Shefi Ekzekutiv i Serisë A, Luigi De Siervo, liga parashikon që të ardhurat nga transmetimet ndërkombëtare potencialisht të rriten në rreth 1.1 miliardë euro në periudhën 2024-2027, për të arritur rreth 1.9 miliardë euro në 2027-2030. Të ardhurat në Itali të Serisë A nga të drejtat e transmetimit mund të rriten në 3.4 miliardë euro në periudhën 2027-2030.

Vlerësimet për biznesin mediatik të Serisë A janë përfshirë në një dokument të paraqitur për 20 klubet, ndërsa liga përgatitet të nisë raundin e ardhshëm të tenderëve të transmetimit për vitin e ardhshëm. Si pjesë e ambicies së saj për t’i dhënë një shtysë biznesit mediatik, pavarësisht një skenari sfidues që përfshin ngadalësimin e rritjes ekonomike dhe rritjen e inflacionit në vend, Serie A po shqyrton krijimin e një kompanie të veçantë për të trajtuar biznesin e saj të transmetimit.

Një veprim i tillë mund të lejojë hyrjen e firmave të kapitalit privat të interesuara për të investuar në zhvillimin e biznesit mediatik të ligës, një rrugë të cilën La Liga e Spanjës dhe Ligue 1 e Francës kanë marrë tashmë.

Zyrtarët e klubeve do të fillojnë të diskutojnë projektin e kompanisë mediatike në një takim të premten, pasi u kontaktuan nga fondi Searchlight Capital me bazë në Nju Jork dhe një grup investitorësh të kapitalit privat të udhëhequr nga Carlyle.

Serie A nuk arriti të finalizonte një projekt të ngjashëm vitin e kaluar, kur shtatë klube bllokuan një marrëveshje prej 1.7 miliardë euro për të shitur 10% të aksioneve në biznesin mediatik të ligës te një konsorcium investitorësh privatë të udhëhequr nga CVC Capital Partners.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.