BE – Kinë: Kompanitë europiane përgatiten për ‘luftë’ – Ato që bëjnë biznes me Pekinin, fillojnë të marrin masat

Kompanitë që blejnë nga Kina lëndë të para ose mallra të gatshme si veshje, këpucë, tekstile, pajisje elektrike dhe elektronike, si dhe lodra janë të shqetësuara për një luftë tarifash midis Brukselit dhe Pekinit dhe kanë filluar të diversifikojnë furnizuesit e tyre në Azi.

Këto lëvizje pasojnë vendimin e SHBA-së për të rritur tarifat për importet e automjeteve elektrike nga Kina në 100% nga 25%, me Komisionin që tani merr atë stafetë duke vendosur një masë të ngjashme. Autoritetet kineze kanë paralajmëruar se nëse vendosen tarifa të reja nga BE, ata do të përgjigjen me lëvizjet përkatëse për ushqim, pije, automjete dhe produkte teknologjike.

Klientët europianë të kompanive kineze me ekspozim të shtuar ndaj Kinës përfshijnë ata që janë aktivë në tekstile, produkte të bardha, elektronikë dhe lodra. Grupet më të mëdha të tilla që importojnë lëndë të para dhe mallra të gatshme në Europë nga Kina mbështeten në atë vend për 80% deri në 90% të furnizimeve të tyre, sipas shifrave të cituara nga Financial Times.

Nga ana e tyre, prodhuesit europianë të makinave, të cilët tashmë kanë ndërtuar fabrika të mëdha në Kinë në bashkëpunim me kompani nga ai vend, do të preferonin ta shmangnin me çdo kusht një luftë të tillë tregtare.

Bashkimi Europian duhet të shmangë fërkimet me Kinën në tregti në një kohë kur bashkëpunimi i industrisë së automobilave të Kinës dhe Gjermanisë për transformimin e gjelbër dhe lidhjen inteligjente është një lëvizje vendimtare për të ardhmen, sipas drejtuesve të lidhjeve të prodhuesve gjermanë të makinave që foli për Bloomberg. Sot, një pjesë e madhe e modeleve kryesisht elektrike të kompanive evropiane importohen në BE direkt nga njësitë e prodhimit në tokën kineze.

Drejtuesit në njësitë e prodhimit të veshjeve të gatshme dhe tekstilit me bazë në Kinë që furnizojnë firmat evropiane me produkte thonë se kompanitë nga Europa kanë filluar të zhvendosen më shumë drejt burimeve nga vende të tilla si India, Bangladeshi dhe Vietnami, pavarësisht faktit se ky diversifikim mund të nënkuptojë kostot më të larta dhe vonesat e transportit, tregojnë shifrat e FT. Kina javën e kaluar akuzoi BE-në se po përpiqet të dëmtojë kompanitë kineze dhe paralajmëroi se do të ndërmarrë veprime për të mbrojtur interesat e saj.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.