Kroacia po blen më shumë armatime – Ushtria kroate do të pajiset me tanke, raketa, dronë

Kristi Ceta /SCAN

Kroacia po investon gjithnjë e më shumë në modernizimin e ushtrisë. Ministria e Mbrojtjes dhe Shtabi i Forcave të Armatosura po zhvillojnë negociata me kompaninë gjermane KMW për blerjen e tankeve të reja Leopard 2A8.

Ushtria kroate aktualisht ka në skuadrën e vet rreth 70 tanke M84, të cilat janë në gjendje shumë të mirë, megjithatë po mendohet fillimisht zëvendësimi i 30 prej tyre. Çmimi i një tanku Leopard sipas të dhënave është rreth 25 milionë euro.

Ky lloj tanku u zbulua për herë të parë në maj të vitit të kaluar në një panair ushtarak në Republikën Çeke. Prodhuesit pretendojnë se në krahasim me paraardhësit, ai ka përmirësuar armët, lëvizshmërinë dhe mbrojtjen. Avantazhi kryesor është një sistem kontrolli më i avancuar i qitjes dhe aftësia për të gjuajtur një gamë më të gjerë municionesh. Tanku gjithashtu ka aftësinë të programojë shpërthimin e municioneve gjatë fluturimit ose në momentin e goditjes.

Ushtria kroate do të pajiset me raketahedhës të shumtë M142 HIMARS në vitet e ardhshme. Një marrëveshje me SHBA-në, me vlerë rreth 300 milionë dollarë, mund të nënshkruhet deri në fund të vitit. Zagrebi gjithashtu po blen raketa M30/31 me rreze veprimi prej 80 kilometrash.

Ministria e Mbrojtjes tashmë ka filluar të prokurojë dronët luftarakë dhe blerjen më të spikatur të avionëve turkë Bayraktar TB2. Prokurimi i tyre do të kushtonte rreth 60 milionë euro. Bayraktarët e parë mund të dorëzohen që në fillim të vitit të ardhshëm. Kostoja e një sistemi Bayraktar është rreth pesë milionë dollarë.

Zagrebi deri në vitin 2027 do t’u paguajë amerikanëve 100 milionë euro të tjera për blerjen dhe modernizimin e automjeteve Bradley dhe 120 milionë euro të tjera për katër helikopterë të rinj Black Hawk. Plani i qeverisë është të alokojë dy për qind të PBB-së për mbrojtje që në vitin 2025.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.