A do mund të paguajmë taksat në kripto? – Tashmë është një realitet në Zvicër dhe po përhapet në Europë

Pagesa e taksave me monedha digjitale është në fakt tashmë një realitet në Zvicër, vend që po udhëheq garën europiane për të futur kripto-n në sistemet tradicionale bankare. Ose përshtatesh, ose vdes, kjo është ndjesia në mbarë botën kur bëhet fjalë për adoptimin e aktiveve digjitale, duke përfshirë kriptovalutat, nga bankat tradicionale.

Europa, pikërisht tani, po udhëheq garën globale, me Zvicrën në krye: jo vetëm që disa nga banorët e saj tani mund të paguajnë kafenë e tyre duke përdorur kripto, por edhe taksat e tyre. Bashkimi Europian po afrohet më shumë, me asetet e kriptove që i nënshtrohen rregullores së gjerë kur Rregullorja e Tregjeve të Kriptomonedhave (MiCAR) të hyjë në fuqi më 1 janar 2025.

Klientët e bankave tradicionale po pyesin tashmë për aksesin në kripto, ndërsa ekspertët shpjegojnë se evolucioni i kësaj teknologjie është i ngjashëm me kalimin nga pagesa me karta krediti në Apple Pay ose Google Pay. Kjo nënkupton se nuk do të ketë nevojë për ndërmjetës, gjë që redukton kostot, ndërsa kriptimi në blockchain – rrjeti i kompjuterëve që përdoret për të ruajtur të dhënat e transaksioneve – shihet si një garanci për mbrojtjen e aseteve të klientit.

Kapitalizimi i tregut të kriptomonedhave është rritur së fundmi në më shumë se 2.4 trilion euro globalisht, afërsisht gjysma e PBB-së nominale të Gjermanisë. Ato operojnë jashtë sistemeve financiare të krijuara dhe nuk janë të lidhura me asete fizike si ari ose të qeverisur nga institucionet financiare qendrore. Megjithatë, si rezultat, ato priren të jenë më të paqëndrueshme se monedhat tradicionale.

Kriptovalutat krijohen përmes një procesi llogaritës të quajtur ‘mining’, i cili është gjithashtu mënyra se si transaksionet hyjnë zyrtarisht në blockchain. Natyra e tij e decentralizuar, e cila regjistron çdo transaksion në këtë rrjet, siguron transparencë. Investitorët dhe analistët e konsiderojnë gjithnjë e më shumë kripto-n si ‘ari digjital’ pasi konsiderohet i sigurtë, për shkak të përdorimit të kriptografisë që premton 100% siguri kundër shkeljeve të identitetit.

Sipas ekspertëve, përdorimi i kriptomonedhave tashmë po përhapet te bizneset dhe klientët në Europë. Ndërsa kripto do të shërbejë si një formë alternative pagese në të ardhmen, ekspertët shprehen se monedhat tradicionale lokale do të jenë ende të forta në dekadat e ardhshme.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.