A po ulet varësia e Shqipërisë për drithëra nga importi? – Raporti midis prodhimit vendas dhe sasisë së blerë nga jashtë
Vendi ynë u prek ndjeshëm nga pasojat e luftës së Rusisë në Ukrainë gjatë vitit që kaloi e cila tronditi tregjet botërore dhe marrëveshjet tregtare. Një ndër shqetësimet më të mëdha ishte rritja e çmimit të grurit në veçanti dhe drithërave në tërësi, si dhe rreziku nga ndërprerja e furnizimit, çka shkaktoi panik tek konsumatorët, të cilët u detyruan të bëjnë furnizime rezervë. Për ti paraprirë një tjetër situate të tillë, Ministria e Bujqësisë ndërmori politikën mbështesë për fermerët vendas përmes subvencionimit me 30 mijë lekë për hektarë për kultivimin e grurit.
Me fondin e akorduar nga Ministria e Bujqësisë prej 500 milionë lekësh u synua, mbështetja e kultivimit të grurit për afro 16 660 hektarë tokë dhe rritja e prodhimit me 20 %. Por si ka ndryshuar varësia ndaj drithërave të importit gjatë këtyre viteve dhe a janë orientuar kompanitë e prodhimit të miellit drejt produktit vendas? Të dhënat zyrtare të Drejtorisë së Përgjithshme të Doganave për 7-mujorin Janar-Korrik 2023, tregojnë një rënie të varësisë ndaj shteteve të huaja sa i takon furnizimit me drithëra.
Konkretisht nëse do të marrim në analizë periudhën këtë periudhë që nga viti 2019, vihet re një rënie e sasisë së importuar. Ndërsa rënia është më e madhe nëse do t’i referohemi vitit pandemik 2020, ku importet, për shkak edhe të frikës nga mbyllja e kufijve, ka qenë më e larta. Konkretisht në janar-korrik të këtij viti janë importuar 130.3 mijë ton drithëra, me një vlerë totale prej 5.1 miliardë lekë, shifër kjo më e ulëta në 5 vite.
Ndërkohë, rënia e sasisë së blerë nga jashtë është vënë re edhe gjatë vitit 2022, ku rezulton sërish që të jetë shifra më e ulët e 5 viteve, e regjistruar në 241 mijë ton. Në krahasim me 2021 ku u importuan 326 mijë ton, rënia llogaritet në 85 mijë ton.
Ndërkohë Shqipëria ka rritur ndjeshëm prodhimin e drithërave, nga 684 mijë tonë në 2020, në 691 mijë tonë në 2021, dhe rritja ka vijuar edhe në 2022. Sipas Ministrisë së Bujqësisë, kjo ulje importi po kompensohet nga rritja e prodhimit vendas.
Nëse do të marrim në krahasim shifrat zyrtare të prodhimit dhe të importit për 2021, rezulton se importi zë 32 % të kërkesës vendase për drithëra, shifër kjo e cila në 2020 ka qenë 35% dhe që vijon të jetë në rënie në 2022.
Importi i drithërave ndër vite, 7-mujor
2019 184.7 mijë ton
2020 219.5 mijë ton
2021 159 mijë ton
2022 135.4 mijë ton
2023 130.3 mijë ton
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.