Administrata Tatimore sqarim për këstet e Tatim Fitimit 2024 – Përllogaritja e kësteve sipas vetëdeklarimit më 2023, detyrim ligjor

Në një sqarim të shpërndarë nga Administrata Tatimore, për llogaritjen e tatim fitimit thuhet se përllogaritja e kësteve, bazuar në vetëdeklarimet e vitit 2023 është detyrim ligjor, dhe si i tillë duhet zbatuar.

Në njoftimin e tatimeve thuhet se ‘Tatimpaguesit, që ofrojnë shërbime profesionale, duhet ta parapaguajnë tatimin për vitin 2024 në përputhje me fitimin e vetëdeklaruar në deklaratën e vitit 2023.

Përllogaritja e kësteve për vitin 2024 bazohet mbi fitimin e vetëdeklaruar dhe vlera e përllogaritur është ndarë për periudhën Prill-Dhjetor 2024, në 9 këste.

Llogaritja e parapagimit është bërë mbi normat progresive: 15% deri në masën e fitimit 14 milion lekë dhe 23% për çdo vlerë fitimi mbi 14 milion lekë. Këstet mund të paguhen në bazë mujore, por edhe një herë në tre muaj sipas datave:

– Brenda 30 qershorit, për muajt prill, maj, qershor

– Brenda 30 shtatorit, për muajt korrik, gusht, shtator

– Brenda 31 dhjetorit, për muajt tetor, nëntor dhjetor.

Për çdo paqartësi tatimpaguesit mund të marrin sqarime në Drejtoritë Rajonale përkatëse.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.