Ankimohet tenderi i Albpetrol për ndotjen – Kërkohet modifikim i kritereve. “Janë përjashtuese dhe kufizojnë konkurrencën”
Tenderi i Albpetrol për monitorimin e ndotjes mjedisore, që shkaktohet nga aktiviteti i nxjerrjes së naftës ka përfunduar pranë Komisionit të Prokurimit Publik pasi një subjekt është ankuar për kritere përjashtuese dhe që bien ndesh me legjislacionin në fuqi.
Tenderi, me fond limit 12.6 mln lekë u hap vetëm pak ditë më parë, ndërsa ka si objekt gjetjen e një konsulenti për monitorimin e 7 lejeve mjedisore në vendburimet e Patosit, Fierit dhe Kuçovës, duke kryer matjet për shkarkimet në tokë, ujë dhe ajër në 80 pika monitorimi. Sipas ankesës së depozituar në KPP, Albeptrol ka kërkuar që subjekti të disponojë licenca, që tashmë janë shfuqizuar e nuk lëshohen më nga insitucionet. Po ashtu, kërkohet që punonjësit e kompanisë, që do fitojë tenderin të jenë të certifikuar në auditimin e eficiencës së energjisë.
Ndërkohë që sipas kompanisë, ky kriter cenon rëndë pjesëmarrjen e operatorëve ekonomisë dhe konkurrencën e lirë, pasi këto shërbime kryhen nga palë të treta dhe nuk ka pse të jenë pjesë e stafit teknik. Janë edhe një sërë kriteresh të tjerë, që kontestohen nga kompania “Tenuis Laboratories”, që kërkon heqjen apo ndryshimin e tyre.
Hapja e tenderit të Albpetrol erdhi vetëm pak kohë pasi emisioni investigativ “EkoSkaner”, në TV SCAN denoncoi faktin se institucionet nuk verifikojnë raportet e vetëmonitorimit që dorëzohen nga bizneset, duke mos patur asnjë të dhënë mbi ndotjen reale. Ndërkohë që, monitorime alternative të kryera përmes laboratorëve të certifikuar në zonën e Patos – Marinzës kanë nxjerrë në pah ndotjen tej normave të lejuara, të shkaktuar nga aktiviteti i nxjerrjes së naftës.
Ola Mitre /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.