Apeli i ministrave europianë të financave – “Një qëndrim më i ashpër fiskal për vitin 2024”

Ministrat e Financave të Eurozonës mbështetën një rekomandim të Komisionit Europian për të filluar shtrëngimin e politikave fiskale, duke hequr gradualisht mbështetjen e qeverisë kundër çmimeve të larta të energjisë për bizneset dhe familjet.

Komisioni Europian javën e kaluar u bëri thirrje qeverive të BE-së që gradualisht të fillojnë shtrëngimin e politikës fiskale pasi një recesion teknik i pritshëm nuk u materializua, tregu i punës ishte shumë i shtrënguar dhe kostot e huamarrjes po rriteshin me shpejtësi ndërsa Banka Qendrore Europiane po punonte për të ulur inflacionin e lartë.

Në një deklaratë të përbashkët për shtyp ministrat e financave të 27 vendeve anëtare u shprehën ndër të tjera se ndërsa pasiguria rreth perspektivës, veçanërisht në lidhje me faktorët gjeopolitikë dhe energjitikë, mbetet në nivel të lartë, rreziqet ndaj rritjes duken më të balancuara se më parë. Ata shtojnë se janë dakord që gjatë viteve 2023-2024, politikat e kujdesshme fiskale duhet të synojnë të sigurojnë qëndrueshmërinë afatmesme të borxhit, duke mbështetur dhe më shumë rritjen ekonomike në një mënyrë të qëndrueshme dhe duke adresuar tranzicionin e gjelbër dhe dixhital e objektivat e elasticitetit përmes investimeve dhe reformave.

Në dritën e perspektivave ekonomike dhe në një kontekst të inflacionit të lartë dhe kushteve më të shtrënguara financimi, ata theksojnë se stimuli fiskal me bazë të gjerë për kërkesën agregate nuk është i garantuar.

Ministrat përsëritën zotimin e tyre për të koordinuar më mirë politikat që mbështesin ekonominë kundër çmimeve të larta të energjisë, në mënyrë që të mos vihen në disavantazh konkurrues vendet më të varfra, të cilat nuk mund të përballojnë aq shumë subvencione energjie sa ato më të pasura.

Ministrat siguruan se në mungesë të ripërtëritjes së goditjeve nga cmimet e larta, do të vazhdohen të hiqen gradualisht masat mbështetëse për energjinë, të cilat do të kontribuojnë gjithashtu në uljen e deficiteve të qeverisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.