Ari vijon të tregtohet pranë 2,050 USD – Tregjet presin PBB dhe shpenzimet konsumatore në SHBA

Ari po tregtohet i qëndrueshëm, pranë 2,050 dollarëve edhe në sesionin e sotëm, ndërsa investitorët po presin të dhënat ekonomike të SHBA për qartësi të mëtejshme mbi lëvizjen e ardhshme monetare të Rezervës Federale.

Kontrata “spot” e arit po tregtohet në rreth 2,035 dollarë për onz, ndërsa kontrata “futures” po tregtohet në rreth 2,050 dollarë për onz. Nëse të dhënat në SHBA do të përforcojnë pikëpamjen se Rezerva Federale do të fillojë së shpejti të ulë normat e interesit, atëherë ari do të fitojë terren. Normat më të ulëta të interesit ulin koston oportune të mbajtjes së metalit të çmuar, i cili nuk jep interes.

Yield-i i obligacioneve 10-vjeçare amerikane po qëndron në nivelin më të ulët në 5 muajt e fundit, ndërsa indeksi i dollarit amerikan po shfaqet i qëndrueshëm. Të dhënat e publikuara të mërkurën treguan se shitjet e shtëpive ekzistuese në SHBA u rritën papritur në nëntor, ndërsa besimi i konsumatorëve u rrit më shumë se sa pritej në dhjetor, mes optimizmit për tregun e punës.

Investitorët tani po presin të dhënat e rishikuara mbi Prodhimin e Brendshëm Bruto për tremujorin e tretë në SHBA dhe të dhënat javore për aplikimin e asistencës së papunësisë, që do të publikohen më vonë gjatë ditës së sotme. Ndërsa të premten do të publikohet indeksi i shpenzimeve të konsumit personal.

Tashmë, tregjet po vlerësojnë një shans prej 80%, që Rezerva Federale të ulë normat e interesit në takimin e marsit. Ndër metalet e tjera, argjendi po tregtohet në rreth 24.2 dollarë për onz, ndërsa platini po tregtohet në rreth 955 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.