Asnjë përjashtim nga mobilizimi për luftë – Izraeli, kombi i startup-eve rekruton edhe të rinjtë e kompanive teknologjike

Në një kohë që Izraeli përgatitet për një luftë që nuk e ka përjetuar në dekada, mobilizimi i forcave ushtarake është më i madhi në historinë e tij. Ky rekrutim ka një ndikim të madh në performancën e kompanive të vogla që prej vitesh i kanë dhënë vendit pseudonimin ‘kombi i bizneseve të reja’.

Forcat e armatosura të Izraelit kanë rekrutuar rreth 360 mijë civilë që kanë kaluar nëpër trajnime ushtarake. Megjithatë, shkalla e draftit do të testojë aftësinë e sektorit të teknologjisë, i cili përbën rreth 20% të ekonomisë së vendit dhe një pjesë të konsiderueshme të aktivitetit global në fusha të teknologjisë së lartë dhe strategjike si siguria kibernetike, inteligjenca artificiale dhe mikroprocesorët.

Rreth 4% e popullsisë së Izraelit prej rreth nëntë milionë banorësh është rekrutuar. Por sipas investitorëve dhe themeluesve të startup-eve, kompanitë e teknologjisë dhe startup-et në veçanti janë të detyruara të ofrojnë një përqindje të madhe të rekrutuarve duke qenë se stafi i tyre përbëhet nga të rinj. Dhe sigurisht, nuk janë vetëm punonjësit e kompanive fillestare që janë hedhur në luftën në Gaza: gjigantët e një shtrirjeje ndërkombëtare dhe veçanërisht në sektorin e teknologjisë punësojnë një numër të konsiderueshëm në Izrael. Microsoft, për shembull, tha se stafi i tij në Izrael arrinte në gati 3 mijë persona.

Javën e kaluar agjencia e vlerësimit të kredisë Moody’s vuri në dukje se ekonomia e Izraelit ka treguar rezistencë të madhe ndaj konflikteve të armatosura në të kaluarën. Por shtoi megjithatë se një konflikt i zgjatur që ndikon në mënyrë agresive në aktivitetin ekonomik dhe vendimmarrjen politike do të testojë qëndrueshmërinë e tij. Disa ndërmarrje fillestare me burime të kufizuara tashmë po e ndiejnë barrën e luftës. Disa kanë humbur tashmë punonjës apo të afërm në luftë. Të tjerë po përpiqen të përshtaten duke operuar me më pak staf për shkak të rekrutimit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.