Banka e Anglisë, rekord të ri 15-vjeçar – Rrit normën bazë të interesit në 5,25%, ndërsa inflacioni në qershor ishte 7,9%

Banka e Anglisë rriti normën e saj bazë të interesit me një çerek pikë përqindjeje në një rekord 15-vjeçar prej 5.25% dhe dha një paralajmërim të ri se kostot e huamarrjes mund të vijojnë të qëndrojnë të larta.

Ndryshe nga Rezerva Federale e SHBA, ose Banka Qendrore Evropiane, të cilat gjithashtu ngritën normat me një çerek pikë javën e kaluar, Komiteti i Politikës Monetare të Bankës së anglisë dha pak sugjerime se rritja e normave do të përfundonte, ndërsa lufton me inflacionin e lartë.

Inflacioni arriti nivelin më të lartë të 41 viteve prej 11.1% vitin e kaluar dhe ka rënë më ngadalë se në vendet e tjera, duke arritur në 7.9% në qershor, më i larti ndër ekonomitë e mëdha.

“Inflacioni godet më pak të pasurit dhe ne duhet të sigurohemi që ai të bjerë deri në objektivin prej 2%”, deklaroi guvernatori Andrew Bailey.

Banka e Anglisë parashikon se inflacioni do të bjerë në 4.9% deri në fund të këtij viti, një rënie më e shpejtë nga sa kishte parashikuar në maj. Kjo do të lehtësojë kryeministrin Rishi Sunak, i cili u zotua në janar të përgjysmojë inflacionin këtë vit, një objektiv që dukej sfidues. Inflacioni pritet kthehet në objektivin prej 2% deri në tremujorin e dytë të 2025, tre muaj më vonë se sa ishte parashikuar në maj.

Sipas Bankës së Anglisë, rritja e pagave kishte qenë një shtytës më i madh i inflacionit të lartë, sesa marzhet e fitimit të kompanive.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.