Bankat qendrore, humbje në rezerva gjatë 2022 – Sondazhet nuk parashikojnë një rimëkëmbje të shpejtë

Bankat qendrore globale shënuan humbje në rezerva në vitin 2022, sipas sondazheve më të fundit,  të dhënat e të cilave theksojnë se nuk shihet një rimëkëmbje e shpejtë në horizont. Ndërkohë rreth 38% e menaxherëve të rezervës presin një recesion global gjatë 12 muajve të ardhshëm.

Sipas sondazheve më të fundit, bankat qendrore globale regjistruan humbje në menaxhimin e rezervave të tyre vitin e kaluar mes alokimeve të rënda të obligacioneve që morën një goditje të madhe pas shtrëngimit agresiv të politikës monetare në mbarë botën.

Rreth 40% e menaxherëve të rezervave, të anketuar, thanë se do të duhen një deri në dy vjet për të rikuperuar humbjet në vitin 2022, ndërsa gati një e katërta besojnë se do të duhen dy deri në pesë vjet.

Forumi Zyrtar i Institucioneve Monetare dhe Financiare, një organizatë që ndjek politikën bankare qendrore dhe ekonomike, anketoi 75 menaxherë rezervash që mbikëqyrnin rreth 5 trilion dollarë aktive, ose rreth një e treta e totalit të rezervave globale që aktualisht vlerësohen në 15 trilion dollarë. Rezervat aktuale janë ulur nga një kulm prej 15.7 trilion dollarësh në fund të vitit 2021.

Ndërhyrjet valutore vitin e kaluar nga autoritetet monetare për të mbështetur njësitë e tyre financiare kundrejt një dollari në rritje kanë kontribuar gjithashtu në humbjet e portofolit në rezervat e bankës qendrore, sipas të dhënave të raportit të forumit.

Për shembull, tregu i obligacioneve në Shtetet e Bashkuara të Amerikës, më i madhi në botë, shënoi vitin më të keq të regjistruar ndonjëherë në 2022 – shin, sipas konfirmimeve të strategëve të obligacioneve. Kjo pasi Rezerva Federale ndërmori rritje të shumta prej 75 pikësh bazë gjatë vitit të kaluar për të frenuar inflacionin e lartë, përpara se të ngadalësonte ritmin e saj.

Megjithatë, pavarësisht humbjeve të shkaktuara nga zotërimet e obligacioneve, menaxherët e rezervave po planifikojnë të rrisin alokimin në këtë treg, së bashku me arin, gjatë dy viteve të ardhshme, duke ushqyer shqetësimet për një ngadalësim global.

Sondazhi tregoi gjithashtu se 32% e menaxherëve të rezervës planifikojnë të rrisin alokimin e obligacioneve gjatë dy viteve të ardhshme, krahasuar me 5% në 2021 – shin dhe 10% në 2022 – shin.

Frika nga stagflacioni, një skenar i karakterizuar nga inflacioni i lartë, si dhe rritja e ngadaltë dhe papunësia, po e çon atë frikë drejt një situate të sigurtë, sipas analistëve. Rreth 38% e menaxherëve të rezervës presin një recesion global gjatë 12 muajve të ardhshëm.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.